“Bizim 2-3 yaşdan 89 yaşadək yoluxmuş xəstəmiz var”.

EdNews bildirir ki, bunu Tibbi Ərazi Bölmələrini İdarəetmə Birliyi (TƏBİB) İdarə Heyətinin sədri Ramin Bayramlı İctimai Televiziyanın “Diqqət mərkəzi-Yekun” verilişində yaş spektrindən danışarkən deyib.

O bildirib ki, süni tənəffüs aparatına bağlı bir xəstənin qidalanması, dərmanlarının verilməsi, gigiyenik yardımının göstərilməsi və s. bütün bunlar çox ağırdır: “Artıq ölkəmizin bütün regionlarında az və ya çox yoluxma faktı var. Biz bir həftə əvvəl yoluxma faktları ilə bağlı təkxanalı rəqəmlərdən danışırdıq, indi cütxanalı rəqəmlərdən danışırıq. Dua edək ki, gələn dəfə üçxanalı rəqəmlərdən danışmayaq.

Bizim xəstəxana tutumumuz var. Qərar vermişik ki, simptomatik və ya asimptomatik olmasından asılı olmayaraq bütün pozitiv xəstələri regionlar daxil olmaqla 22 xəstəxanaya yerləşdirək. Tibb müəssisələrində onları təcrid edək. İki aylıq bir təcrübəmiz var. Deyə bilərik ki, özünü qrip adı ilə evdə müalicə etmək istəyən şəxslərin sonradan vəziyyəti yaxşı olmur. Bu gün özünü çox yaxşı hiss edən sabah ağırlaşa bilər. Həmin şəxsləri biz nəzarət altında saxlamaqla, həm də onların ailə üzvlərini qorumuş oluruq.

Bu gün imkanımız buna yol verir. Ancaq gündəlik yoluxma halları üçxanalı rəqəmlərə çıxsa, vəziyyət çətin olacaq. Bizim 2-3 yaşdan 89 yaşa kimi yoluxmuş xəstəmiz var. Bu virusun yoluxması sərhəd tanımır".

Ramin Bayramlı onu da qeyd edib ki, bir yoluxma halı 30, 50, bəzi faktlara görə hətta, 60-a yaxın insanı yoluxdurur: “İnkubasiya dövrünün 14 gün olmasının üzərində dayandıq və müşahidə elədik ki, bəli, 14-cü günə qədər yoluxmamış hallar -  inkubasiya dövrünü bitiririk, neqativ çıxır və evə göndəririk. Amma  yoluxmuş halların 14, 21, 28-ci günə qədər davam etdiyini görürük. Tətbiq edəcəyimiz müalicənin effektivliyi orqanizmin immun sisteminin cavabından asılıdır”.(virtualaz.org)