2020-ci ildən tüğyan edən COVİD-19 virusu epidemiyasından sonra dünyanın müxtəlif ölkələrində insanlar arasında yeni dəhşətli viruslar yayılmaqdadır.
İlk olaraq Mərkəzi və Qərbi Afrika ölkələrində meydana gələn meymunçiçəyi adlandırılan bu epidemiya koronavirusdan sonra hələ ki, ən təhlükəlisidir. Meymundan insana keçən bu endemik virusun yaratdığı nadir xəstəliklə başlayan yoluxma, insan ölümünə də səbəb olur, hətta mütəxəssislərin fikrincə, burada ölüm riski koronovirusda olduğundan qat-qat böyükdür.
Meymunçiçəyi ilə yanaşı insanlar daha bir yeni virusla "Krım-Konqo" tanış oldular. Qızdırma ilə müşahidə olunan bu virus İranda peyda olub. Artıq ölkədə 9 nəfərdə sözügedən xəstəlik aşkarlanıb, onlardan biri isə vəfat edib. Bununla əlaqədar İranın kənd təsərrüfatı nazirinin müavini xalqı heyvan ciyərindən hazırlanmış kabab yeməməyi tövsiyyə edib.
Dünyada yayılan virusların siyahısını uzatmaq da olar, nəzərə alaq ki, koronavirus pandemiyası hələ də bitməyib.
Hazırda yayılan digər ölümcül virusların meydana çıxmasında sönməkdə olan koronavirusun təsiri ola bilərmi?
Məsələ ilə bağlı həkim-terapevt Rasif Bağırov Ednews-a açıqlaması zamanı bu xəstəliklər arasında hər hansı bir əlaqənin olmadığını deyir.
“Koronavirus və digər virusların hərəsinin özünün konkret mikroskopik forma və strukturu var. Bunlar fərqli formalarda ortaya çıxır, eyni zamanda təsiredici əlamətləri də tamamilə fərqlidir. Baxmayaraq ki, virusların əksəriyyəti qızdırma ilə müşayiət olunur, onlar ayrı-ayrı xəstəliklər törədirlər. İran kimi ölkədə 9 nəfərdə virus aşkarlanıbsa, bu çox kiçik rəqəmdir. Xəstəlik tapılır, ləğv edilir, dayanır və daha olmur”.
Həkim ekspertin sözlərinə görə, bu cür viruslar əslində hər zaman olub.
“Virus var ki, koronavirus kimi insanlarda böyük mənəvi-psixoloji təlatümlər yaradır, kütləvi yoluxmalarla müşahidə olunur. Digərləri isə qısa zamanda peyda olub, daha sonra də yayılmadan yoxa çıxırlar. Ona görə hər bir yaranan virusa qorxu ilə yanaşmaq olmaz. Elə xəstəlik var ki, heyvanın qaraciyərində toplanır və ətini insan yeyəndə yoluxur. Nəticədə insanların qaraciyərlərində xərçəng, müxtəlif xəstəliklər inkişaf edir və bu aşkar olunanda insanlarda təşviş yaradır. Bunu koronavirusla əlaqələndirmək düzgün deyil. Sadəcə əvvəllər belə informasiya olmurdu və koronavirusdan sonra hər bir xırda detalara insanların reaksiyası neqativ olur”.
Gülnar Səlimova