Səudiyyə Ərəbistanının Ərzaq və Əczaçılıq İdarəsi yerli qəhvənin sirrləri və onun  tərkibində olan ən vacib qida maddələri və hazırlanma üsulları barədə məlumat yayıb. Məlumatda həmçinin qeyd olunub ki, qəhvənin tərkibi bölgədən-bölgəyə fərqlənir.

Ednews xəbər verir ki, qurum Səudiyyə qəhvəsinin qonaqpərvərliyin simvolu olduğunu vurğulayaraq, ona əlavə edilən ədviyyatlar arasında hil, mixək, zəfəran və zəncəfilin də olduğunu açıqlayıb. Əsl Səudiyyə qəhvəsinin tərkibində 5 qram(1 çay qaşığı) qəhvə və bir sıra ədviyyatlar yer alır. 

Səudiyyə Ərzaq və Əczaçılıq İdarəsinin məlumatında bir fincan Səudiyyə qəhvəsinin (50 ml tutumlu) 26 milliqram kofein tərkibli olduğu da qeyd olunub. Qeyd edək ki, Dünya Səhiyyə Qurumu tərəfindən insan orqanizmi üçün gündəlik kofein qəbulu 400 milliqram təyin edilib.

Körfəz Sağlamlıq Şurasının məlumatında isə qara qəhvəni gündə 4 fincanı keçməmək şərti ilə qəbul etmək tövsiyyə olunur.

Qeyd edək ki, qəhvənin insan sağlamlığı üçün bir sıra faydaları da mövcuddur:

1/ Depressiyanı azaldır və xoşbəxtlik hormonlarını artırır;

2/ Ürək və damarlara faydalıdır və yaddaşı gücləndirir;

3/ Antioksidantlar və maqnezium, kalium və bəzi vitaminlər kimi faydalı qidalarla zəngindir;

4/ Ayzeymer və ikinci tip diabet riskini azaldır;

5/ Bəzi xərçəng növ risklərinin qarşısını alır.

Rəna Mürşüd