Bir müddətdir Azərbaycanda əhali arasında qrip siptomplu xəstəlik yayılıb. Həm böyüklər, həm də uşaqlarda təsadüf olunan virus sürətlə yayılır və həftələrlə davam edir. 

Təhlükəli virus daşıyıcıları 40-a çatan yüksək hərarət, burun axması, boğaz, baş, qulaq, əzələ-sümük ağrıları və şiddətli öskürəkdən şikayətlənirlər. Xüsusən qulaqlarda uğultu, tutulma, baş ağrılarından əziyyət çəkdiklərini deyən xəstələr bir neçə gün sonra xəstəliyin yüngülləşdiyini, lakin qəflətən təkrar yüksək hərarətin başladığını qeyd edirlər. Hətta təhlükəli virusun COVID-19-un “omicron” ştamı, “donuz qripi” olması ilə bağlı iddialara da rast gəlinir.

İnfeksionistlər deyir ki, bu xəstəliyin qəflətən başlaması, kəskin əlamətlərlə müşahidə edilməsi qrip xəstəliyindən xəbər verir və müşahidələr göstərir ki, bu xəstələr daha çox ev şəraitində yoluxurlar. 

Mövzu ilə bağlı Ednews-a açıqlamasında Adil Qeybulla bildirib ki, hazırda ölkədə bir neçə virus mövcuddur:

 “Pandemiya hələ sona çatmayıb, “Omicron”un mutasiyaları davam edir. Hər il bu vaxtlar soyuqdəymə xəstəlikləri daha çox vüsat alır və onların içərisində viruslar, qrip, koronavirusun 4 növü mövcuddur. Bütün bunların hamısı bu gün qarışıq mənzərə yaradır. Digər tərəfdən hazırda Rusiyada və Ermənistanda rəsmən “donuz qripi”nin yayılması elan olundu və bizdə də onun olması istisna deyil. Məhz buna görə də yenə tibbi maskalardan istifadə etməli, məsafə gözləməli, əllərin dezinfeksiyasına diqqət etməliyik ki, yoluxma sayını minimuma endirək. Ümumiyyətlə, bundan sonra bu bizim üçün mədəniyyət formasına çevrilməlidir”. 

Artıq bir sıra Avropa ölkələrində qrip sürətlə yayılmağa başlayıb. Hətta bəzi ölkələrdə qrip hallarının koronavirusa yoluxan şəxslərin sayına çatdığı bildirilir. Qripə yoluxma artdığından Belçika, Almaniya və Slovakiyada rəsmi olaraq qrip epidemiyası elan olunub. 

Qeyd edək ki, Azərbaycan Səhiyyə Nazirliyi də bir neçə gün əvvəl kəskin respirator virus infeksiyası ilə bağlı əhaliyə xəbərdarlıq edib.

 

Aytən Yaşar

 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary