Son günlərdə qidadan zəhərlənmə hallarının sayında artım müşahidə olunur.

Qida Təhlükəsizliyi Agentliyinin statistikasına əsasən, 2023-ci ilin yanvar-mart ayları ərzində Azərbaycanda qida zəhərlənmələri ilə bağlı 212 müraciət daxil olub. Onlardan 41-də zəhərlənmə faktı təsdiq olunub, 1 nəfər isə vəfat edib.  

Zəhərlənmələrin səbəblərilə bağlı Ednews-a danışan qida təhlükəsizliyi üzrə ekspert Ağa Salamov bildirib ki, ərzaqların standartlara uyğun olmayan şəkildə emalı, saxlanılması prosesi belə hallara yol aça bilər:

“Ümumiyyətlə, qida zəhərlənmələri ərzaqların emalı prosesində, daşınmasında buraxılan kobud səhvlərə, saxlama şəraitinin standartlara uyğun olmamasına görə baş verir. İsti saxlama dolablarında saxlanılan yeməklər çox vaxt kənardan gətirilir və 1-2 saat sonra mikroçirklənməyə məruz qalır. Bu da məktəblərdə şagirdlərin zəhərlənməsinə gətirib çıxarır. Evdə qida zəncirindən xəbəri olmayan insanların yemək bişirməsi də zəhərlənmələrin səbəbləri arasındadır”.

Qida təhlükəsizliyi üzrə ekspert onu da bildirib ki, məktəblərdə zəhərlənmələrə görə birbaşa direktorlar məsuliyyət daşıyır:

“Onların işlərinə laqeyd yanaşmaları səbəbindən belə hallar baş verir. Şagirdlərə yemək hazırlayan işçilər müəyyən qaydalara əməl  etməlidirlər. Ona görə də ümumi təhsil ocaqlarında, uşaq evlərində və baxçalarda qida təhlükəsizliyilə bağlı ciddi monitorinqlər aparılmalı, nöqsanlar üzə çıxarılmalıdır. Mütəmadi olaraq qidalara xüsusi nəzarət edilməli, gigiyena-sanitariya qaydalarına riayət olunub-olunmaması araşdırılmalıdır. Yeməklərin keyfiyyəti yoxlanılmalı, nümunələr götürülməlidir”.

Ekspert şadlıq sarayları və restoranlarda da vəziyyətin bərbad olduğunu bildirib:

“Bişirildikdən sonra otaq temperaturunda masaya düzülən bəzi  yeməklər, məsələn, balıq, toyuq, ləvəngi, mayonezli  salatlar və s. zəhərlənmələrə gətirib çıxarır.  Belə yeməklərin 2 saat öncədən servis edilməsi tövsiyə olunmur”.

Vəfa Ustayeva