Eurasia Diary  saytı əməkdaşının Küveytin Azərbaycandakı səfiri Səud Əbdüləziz Məhəmməd əl-Şəmlan əl-Rumi ilə müsahibəsi.

Həmin müsahibəni təqdim edirik:  

Cənab səfir! Azərbaycanla Küveyt arasındakı əlaqələrin indiki vəziyyətini  və prespektivlərini necə qiymətləndirirsiniz?

Küveyt Dövlətini Azərbaycanla uzun illərdən bəri yaxın və çox yaxşı əlaqələr bağlayır.  Bu əlaqələrin din və adət-ənənə baxımından qədim tarixi var, ənənələrimiz eynidir. Mərhum əmir Şeyx Cabir əl-Əhmədlə mərhum prezident Heydər Əliyev arasında çox yaxın və yaxşı münasibətlər var idi. Bu əlaqələr, təbii ki, bu gün də davam edir. Biz hər zaman bu əlaqələrin daha da möhkəmlənməsinə və  yaxşılaşmasına  çalışırıq. Keçən illər ərzində Küveyt, Ermənistanla müharibə nəticəsində qaçqın düşmüş Azərbaycan vətəndaşları üçün nəzərdə tutulmuş  humanitar yardımla dolu 4 təyyarə göndərmişdir. 

Burda işlədiyiniz müddət ərzində Azərbaycanda baş verən müsbət dəyişiklər və inkişaf barədə fikrinizi bilmək istərdik?

Mən Azərbaycanda işləməyə başlayanda da əlaqələrimiz çox yaxşı idi. Biz ildən-ilə bu əlaqələrin daha da inkişaf  etdirilməsini istəyirik. Xüsusilə, 2009-cu ilin fevralında  Prezident İlham Əliyevin Küveytə  rəsmi səfəri böyük uğurlarla nəticələndi. İndiyə qədər Azərbaycanla çox saylı sazişlərə imza atmışıq. Azərbaycanla Küveyt arasında rəsmi səviyyədə əlaqələrdə Hökumətlərarası Birgə Komissiyanın rolu böyükdür. Bu yaxaınlarda hər iki ölkənin Xarici İşlər Nazirlərinin rəhbərliyi ilə Küveytdə Birgə Komissiyanın iclasları keçiriləcəkdir. Küveyt, demək olar ki,  hava yolu baxımından Azərbaycana ən yaxın ölkələrdən biridir. Təyyarə ilə səfər 1 saat 50 dəqiqə davam edir. Bu isı  Azərbaycana turist  axınının çoxalmasına səbəb olub. Belə ki, Küveytdən Azərbaycana  həftədə 7 reys həyata keçirilir.

Azərbaycan Ermənistan Dağlıq Qarabağ münaqişəsində Küveytin mövqeyi necədir?

Küveyt Dövlətinin Ermənistan-Azərbaycan Dağlıq Qarabağ münaqişəsində mövqeyi aydın və sabitdir: Küveyt BMT-nin bu münaqişə ilə bağlı bütün qərarlarını dəstəkləyir. Təbii ki, biz həmişə münaqişələrin sülh və danışıqlar yolu ilə həllinə çağırmış, siyasi həllə üstünlük verib müharibədən çəkinməyi tövsiyyə etmişik.

Küveyt iş adamları Azərbaycanda investesiya qoyuluşuna maraq göstərirlərmi?  Hansı sahələr onlar üçün daha cəlb edicidir?

Bu il ərzində bir çox bölgələrə, o cümlədən Sumqayıta, Naxçıvana və Qubaya səfər etmişəm.  Sumqayıtda  səfərdə olduğum zaman  bir çox müəssisələrlə tanış olduq.  Səfər zamanı olduğum aluminum , elektrik kabelləri və boru istehsalı müəssisələri şəxsən mənim çox xoşuma gəldi.  Təbii ki, bu müəssisələr Küveyt iş adamlarında maraq doğurur. Səfərim barədə hesabat hazırlayıb Küveyt Sənaye və Ticarət  Palatasına təqdim etmişəm, hesabata bu müəssisələrin kataloqlarını da əlavə etdim ki, iş adamları onlarla tanış olsunlar.

Müsahibə üçün sağ olun, cənab səfir! Oxucularımıza hansı arzularınızı bildirmək istərdiniz?

Mən şəxsən arzu edirəm ki, hər iki ölkə arasında turizm əlaqələri möhkəmlənsin.  İstərdim ki, Azərbaycan vətəndaşları Küveytə gəlsinlər, Küveyt xalqının mədəniyyəti ilə tanış olsunlar. Bildiyiniz kimi, Küveyt demokratik bir ölkədir və ölkə sakinləri ilə bura gələn bütün millətlərin nümayəndələri bərabər hüquludurlar. Nəzərə alsaq ki, Küveytlə Azərbaycan arasındakı məsafə bir çox ölkələrdən daha yaxındır. O zaman bu imkanlardan səmərəli şəkildə istifadə etmək olar.

Müsahibəni hazırladılar Zakir Qasımov və Haşım Məmmədov.

Ərəb dilində tərcümə etdi Zakir Qasımov

ednews.net