Rəsmləri danışan xəttat - Rəşad Ataşovla müsahibə - FOTOLAR | Eurasia Diary - ednews.net

Rəsmləri danışan xəttat - Rəşad Ataşovla müsahibə - FOTOLAR

21.05.2019 15:20 Müsahibə A- A A+

Azərbaycan xalqının uzun əsrlərdən bəri yaşatdığı qədim sənət növlərindən biri də xəttatlıqdır. Gənc xəttat Rəşad Ataşovu digər xəttatlardan fərqləndirən cəhət hərflərlə insan simasını yaratmasıdır. Belə ki, o, şəxsin simasını hərflərdə əks etdirir. Rəşad rəsmi kalliqrafiya (hüsn- xətt) ilə sintez edib dahi şəxsiyyətlərin portretlərini yaradır. Rəşad 1983-cü ildə Bakıda anadan olub. Xəttatlığa marağı uşaqlıq dövründən başlayıb. Bu sahədə xüsusi olaraq müəllimi olmayıb. Xalq rəssamı Mübariz Gəncəlidən insan anatomiyasını öyrənib. Xəttatlığa olan həvəsi oxuduğu Quran ayələrindən, ərəb hərflərinə olan məhəbbətindən yaranıb. Xəttat və Quran qiraətçisi Rəşad Ataşov Eurasia Diary-ə müsahibə verib.

İki fərqli sənəti - rəssamlıq və xəttatlığı bir araya gətirmək ideyası sizdə necə yarandı?

- Əlbəttə, bu sənətlə məşğul olanlar bilir ki, islam dininə mənsub olan mühafizəkar dindarlar zaman-zaman rəssamlığın lehinə olmayıblar. Elə məhz buna görə də rəssamlıq müsəlman toplumunda bir o qədər inkişaf etməmişdir. Lakin, mən bu işə addım atmaqla bu iki sənəti bir araya gətirməyə cürət etdim. Əlbəttə, demirəm bunu ilk olaraq mən etmişəm. Əsla! Amma bu işi məhz maksimum səviyyədə oxşatmağı ilk olaraq başlayanlardan biri də mənəm. Əvvələr bu cür işlər olmayıb. Yalnız ayələr və müqəddəs yazıları fisünkar olaraq işləyiblər.

Azərbaycanda əsərlərinizdən ibarət sərgi təşkil edilibmi? Əl işləriniz necə təbliğ olunur?

- Əl işlərim hələ hər hansı bir xarici ölkələrdə nümayiş olunmayıb. Ancaq yaxın gələcəkdə bunlar baş tutacaq. Sərgim isə hələ ki, olmayıb. Amma yaxın aylarda olacaq.

Ölkəmizdə bu sənətə maraq hansı səviyyədədir? Sizdən sonra bu işi davam etdirəcək tələbələrimiz varmı?

- Azərbaycanda buna maraq olduqca böyükdür. Həmçinin, insanların ilgisini çəkəcək səviyyədə maraqlı bir işdir. Elə ona görə də əksər TV-lər, xəbər portalları bu haqda mənim üçün sujet hazırladılar ..

Gələcək planlarınız barədə danışardınız.

- Allah ömür vəfa etsə, inşallah bütün nəzərdə tutduğum layihələri həyata keçirtmək istəyirəm...