Azərbaycanda keçirilən “TEKNOFEST” Festivalının çıxış edən “Baykar” şirkətinin texniki direktoru Səlcuq Bayraktar “Teknofest niyə təşkil olunur?” sualına cavab olaraq azərbaycanlı tələbənin fikrindən sitat gətirib.
O, "Əlbəttə, dünya türkün gücünü görsün və yerini bilsin" deyə qeyd edib.
Gündəmi zəbt edən cavabın sahibi Bakı Dövlət Universitetinin Jurnalistika fakültəsinin 3 cü kurs tələbəsi Züleyxa Ağaməliyeva Selçuk Bayraktarla necə həmsöhbət olduğunu, keçirdiyi hissləri Ednews-la bölüşüb.
Z.Ağaməliyeva ilə maraqlı müsahibəni təqdim edirik:
-Səkçuk Bayraktarla qarşılaşma anınız necə oldu? Onunla söhbətinizi necə xatırlayırsız?
- Media könüllüsü kimi 26 may tarixində festivala mən də qatıldım. Orada Səlcuq Bayraktar ilə qarşılaşdım. Yaxınlaşıb şəkil çəkdirmək üçün icazə istədim. O, da nazakətlə razı oldu. Bir neçə dəqiqə söhbət etdik. Sonda o, anidən mənə “Səncə Teknofest niyə təşkil olunur?” sualını mənə ünvanladı. Mən də cavab olaraq "Əlbəttə, dünya türkün gücünü görsün və yerini bilsin" dedim, o, isə məni alqışlayaraq təşəkkür etdi.
-Bu festival sizin üçün başqa nələri ifadə edir?
-Düşünürəm ki, festivalın keçirilməsi ölkəmiz, əsas da gənclər üçün qürur mənbəyidir. Onlar burada yeni texnologiyalarla tanış olub və maarifləndilər. Milli texnologiyaların təbliği və məlumatlandırılması çox böyük addımdır. Həqiqətən də möhtəşəm bir təşəbbüsdür.
-Səlçuk bəyin nitqi zamanı sizin sözlərinizi vurğulamasını ilk eşitdiyiniz zaman təəssüratlarınız necə oldu?
-Səlçuk Bayraktarın çıxışında sözlərimi vurğulaması məndə qürur hissi oyatdı. Həmin an tutulub qaldım, gözlərim doldu... Düşünürəm ki, gənclərin səsi həmişə dinlənilməlidir. Mənim səsimi duyduğu və öz nitqində bunu xüsusi olaraq vurğuladığı üçün Səlcuq bəyə öz dərin təşəkkürlərimi bildirirəm. Gələcəkdə Səlcuk Bayraktarla birdə görüşmək imkanı əldə etsəm şəxsən əlini sıxıb, təşəkkür edəcəm.
-Dostlarınız və yaxınlarınızın reaksiyası necə oldu?
-Dostlarım, yaxınlarım ən az mənim qədər qürur hissi keçirdilər. Hətta Səlçuk bəyin nitqini paylaşaraq mənimlə qürur duyduqlarını, sevinclərini bölüşdülər. Əlbəttə ki, bu da mənə çox yaxşı təsir etdi.
-Suallarımızı cavablandırdığınıza görə sizə təşəkkür edirik. Sizə həyatınızda, təhsilinizdə uğurlar arzulayırıq.
-Minnəttaram.
Ləman Abbaslı
