Sosial şəbəkələrdə Xınalıqdan olan 13 yaşlı İbrahim Zeynalovun turistlərlə ingils dilində danışmağı izləyicilər tərəfindən böyük maraqla qarşılanıb. 

Bu dəfə İbrahim Zeynalov Ednews-a danışıb. 

- İbrahim, neçə yaşın var?

- 13.

- Neçənci sinifdə oxuyursan?

- Altıncı sinifdə.

- Turistlərlə necə qarşılaşırsan? Onlarla nə söhbətlər edirsən?

- Atam 12 ildi muzeydə işləyir. Orada tez-tez xarici qonaqlar gəlir. Atama kömək eləmək məqsədilə ora gedirəm, turistlərə Xınalıq haqqında məlumatlar verirəm. Muzeydə atamla bərabər oluruq, o, turistlərə eksponatlar haqqında danışır. Onları digər muzeylərə aparıram. Azərbaycanın tarixindən də danışıram. 

- İngilis dilini məktəbdən öyrənmisən?

- İngilis dilini müəllimlərdən və özüm evdən çalışaraq öyrənmişəm. Daha çox atamın təşəbbüsü ilə müəllim yanına da getmişəm. 

- Tədris almağın üçün MÜASİD səni İngiltərəyə aparır. Bu haqda danışarsan...

- İki həftəlik praktikaya göndərəcəklər. Maarifləndirmək üçün. Londona gedəcəm.

- Böyüyəndə kim olacaqsan? 

- Hüquqşünas olmaq istəyirəm.

- Londona gedəndən sonra bəlkə elə xarici ölkədə təhsilini davam etdirmək istəyəcəksən?

- Vallah, qərar verməmişəm hələ. Başqa ölkə də ola bilər. 

- Sosial şəbəkələrdə, mediada bir anda hər kəs səndən danışdı. Bu barədə məktəbdə necə qarşılandın?

- Məqsədim əslində məşhur olmaq deyildi. Sadəcə ingilis dilimi təkmilləşdirmək üçün turizmlə məşğul olurdum. Məktəbdə uşaqlar danışır məndən, tərifləyirlər, deyirlər ki, qürurmuz, fəxrimizsən. Amma bu mənə o qədər maraqlı gəlmir. Yenə də sağ olsunlar. 

- Xınalığı çox sevirsən?

- Burada doğulub böyümüşəm. Kəndimi sevirəm. Amma bir gün burdan ayrılacam və təhsilimi daha yuxarı səviyyələrə qaldıracam. Çalışacağam ki, özümü və ingilis dilimi daha da inkişaf etdirim. 

- Ucqar kənddə yaşayırsan. Kənd məktəbindəki təhsil barəsində nələr deyərdin? Uşaqlar oxumaq istəyirmi?

- Məktəbdə tədris çox yaxşı gedir. Yoxlama dərslərimiz olur, sinif yoldaşlarım dərslərini yaxşı oxuyurlar. Dövlət bizi kitabla təmin edir, pulsuz verir kitabları. Məktəb kitabxanasından da əlavə kitablar götürüb mütaliə edə bilirik. 

- Sinifdən xaric kitablar oxuyursan?

- Bədii kitablar oxuyuram. Nağıllar, hekayələr. Cəlil Məmmədquluzadənin bütün əsərlərini oxumuşam. 

- Ən sevdiyin əsər hansıdır?

- “Dəli kür” əsəri. Nizami Gəncəvinin, Səməd Vurğunun da şeirlərini oxumuşam. Azərbaycanın demək olar bütün dramatuqlarını sevirəm. 

- Arzularını, gələcəklə bağlı planlarını bilmək olarmı?

- İstəyirəm ki, Azərbaycana layiqli hüquqşünas olam. Arzularım çoxdur. Xarici ölkələrdə Azərbaycanı təmsil etmək arzum var. 

- Gələcək təhsilində sənə uğurlar diləyirik.

- Çox sağ olun, şad oldum. 

Qeyd edək ki, Müstəqil Sənayeçi və İş Adamları Dərnəyi (MÜSİAD) və MÜSİAD İbrahimi Londona oxumağa göndərəcək. 

Söhbətləşdi: Oğuz Ayvaz

• Tag:
• Xınalıq
• İbrahim
• məktəb
• təhsil