“Ermənistanın indiki hakimiyyəti ilə Azərbaycan hökuməti əslində bir məsələdə həmfikirdir - Qarabağla bağlı bütün hadisələr, Qarabağ müharibəsi və s. nəticəsində Rusiyanı regiondan sıxışdırıb çıxarırlar”,- bu fikirləri Rusiya Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini Konstantin Zatulin deyib. Görünür duma daxilində Azərbaycan-Rusiya münasibətlərinin yaxın olmasından narahat olan qüvvələr var.
Bəs bu cür qüvvələr iki ölkə arasındakı münasibətlər öz təsirini göstərə bilərmi?
Ağ Partiya sədri Tural Abbaslı Ednews – a açıqlamasında bu cür açıqlamaların əsasən Kreml tərəfindən idarə olunan, hökümətin fikrini fərdi səviyyədə çatdıranlar olduğunu söyləyib:
“Mən düşünmürəm ki, Rusiya Dumasında müstəqil fikirli şəxslər olsun. Oradakı şəxslərin böyük bir əksəriyyəti Kreml tərəfindən idarə olunur. Vaxtılə Vladimir Jirinovskiy adlı bir Duma üzvü də var idi. Hansı ki, o, da dəfələrlə Azərbaycana qarşı əsassız fikirlər səsləndirirdi. İndi də Zatulin Rusiya da anti – Rusiya ab-havasından şikayətlənir. Lakin Rusiya yaranmış mövcud geosiyasi reallıqları dərk etməli və anlamalıdır ki, Rusiya artıq 2020 – ci ilin sentyabrına və Ukrayna müharibəsinə qədər ki, Rusiya deyil və ola da bilməyəcək. Yeni şərtləri və situasiyanı dərk edib, həmin o nizama uyğunlaşmağa çalışmalıdır”.
Partiya sədri daha sonra bu cür çıxışların Rusiyanın təsir imkanlarının zəif olduğunun göstərgəsi olduğunu söyləyib:
“Həm də bu çıxışı bu cür qeyd etmək olar – Rusiyanın Cənubi Qafqazdaki tutacağı yeni mövqe uğrunda mübarizəsi. Çalışır ki, əvvəlki kimi qalsın və təsir imkanlarını saxlasın. Sonda görəndə ki, bu mümkün deyil, o artıq regiondakı yeni statusunu qəbul edəcək. İnanmıram ki, bu cür fərdi çıxışlar Rusiya – Azərbaycan münasibətlərinə köklü təsir göstərsin. Çünki ortada həmçinin Türkiyə faktoru var və iki ölkənin münasibətləri həmin faktorun üzərindən analiz olunur. O, baxımdan belə çıxışlar Rusiyanın narahatlığını və təsir imkanlarının zəif olduğunu göstərir. Artıq reallıq odur ki, regionda Rusiyanı Türkiyə əvəz edir. Azərbaycan da ona əsasən daha çox Türkiyə ilə münasibətlərinin inkişafına çalışır”.
Əkbər Novruz
