“Bakıda ərazi sıxlığının aradan qaldırılmasının yeganə yolu Abşeron əhalisinin Azərbaycanda işğaldan azad olunan ərazilərə planlı və sistemli şəkildə köçürülməsidir”.

Bu sözləri iqtisadçı Natıq Cəfərli Ednews-a açıqlaması zamanı bildirib.

O, həmçinin qeyd edib ki, Bakı şəhərində olan əhali sıxlığının qarşısı alınmazsa ciddi problemlərə səbəb ola bilər:

“Təəssüf ki, əhalinin köçürülməsindən başqa əsaslı və ən azından qısa müddətli alternativ vədd etmək çətindir. Çünki Bakıda həddindən artıq böyük sıxlıq var.

Həmçinin bu regionda olan əhali sıxlığı artıq hər kəsə məlumdur və qarşısı alınmazsa ciddi problemlərə səbəb ola bilər.

Bakının infrastrukturları 2 milyon nəfərə qədər nəzərdə tutulduğu halda, hazırda Bakıda 4 milyona yaxın əhali yaşayır.

Bakı yalnız Bakı şəhərindən ibarət deyil. Ümumilikdə Abşeron yarımadası böyük Bakını təşkil edir.

Bütün bu fəsadları aradan qaldırmaq üçün ən azından  10 ildə 1 milyona yaxın insanın köçürülməsi planlaşdırılmalıdır.

Qarabağda  həm əhalinin yerləşdirilməsi, həm də insanların ərazidə yaşaması üçün iqtisadi şəraitlərin yaradılması vacib məsələdir. Əhalinin Qarabağa köçürülməsinin hərtərəfli müsbət cəhətləri var.

Məsələn bu zaman Qarabağ iqtisadiyyatınn inkişaf etdirilməsi üçün əhalinin ora köcüçürülməsi ümumi Azərbaycan iqtisadiyyatına müsbət təsir göstərəcək. Həmçinin bu Bakıda əhali sıxlığını azaldacaq. Əgər bir milyona yaxın əhalinin həmin regiona sistemli şəkildə köçürsək ən azından vətəndaşların yarıdan çoxu Bakı şəhərindən köçəcək”. 

İqtisadçı əlavə olaraq bildirib ki, Bakıda əhali sıxlığının tənzimlənməsi üçün digər alternativ yol isə ikinci milyonluq şəhərin yaradılmasıdır:

“Gəncə və ya Xankəndi kimi şəhərlərdə şəhər genişləndirməsi üçün dövlət və yerli qurumların iş birliyi ilə effektiv şəhər planlaması tədbirləri tətbiq edilməli və genişləndirilməsi planlanan şəhərlər  üçün yeni yol və nəqliyyat infrastrukturunun inkişafı təmin edilməlidir.

Həmçinin yeni ərazilər genişləndirilmiş əhali üçün yeni iş və yaradılması ilə bağlı strategiyaları dəstəkləməlidir. Genişlənmiş ərazilər üçün təhlükəsizlik tədbirləri və təşkilatçılıq prinsipləri əhəmiyyətli olaraq nəzərə alınmalıdır.

Bu tədbirlər birləşdirildikdə, şəhərlərin genişləndirilməsi və əhalinin Qarabağa köçürülməsi nəticəsində Bakıda əhali sıxlığı problemi  daha effektiv və sürətli bir şəkildə həll oluna bilər”.

Xəyal Ramiz