"ABŞ Konqresinin Nümayəndələr Palatasında “Dağlıq Qarabağın gələcəyi” mövzusunda keçirilmiş dinləmələr, 907-ci düzəlişlə bağlı qəbul olunan radikal qərar bir daha göstərdi ki, qərb güclü, suveren, müstəqil Azərbaycan dövlətini qəbul edə bilmir". 

Bu fikirləri deputat Könül Nurullayeva Ednews-a açıqlaması zamanı deyib.

O, əlavə olaraq qeyd edib ki, təsadüfi deyil ki, erməni lobbisinin təsiri altında keçirilən tədbirin təşkilatçısı, Konqresin Avropa məsələləri üzrə alt komitəsinin sədri Tomas Kin bundan əvvəl Ermənistanın ABŞ-dakı səfiri Lilit Makuns ilə görüşüb:

"Reallıq isə bundan ibarətdir ki, Azərbaycanın istər ABŞ, istərsə də Konqres qarşısında heç bir öhdəliyi yoxdur. Heç bir ölkə Azərbaycan təzyiq dili ilə danışa bilməz və bu gün Azərbaycanın heç kimin yardımına ehtiyacı yoxdur.Bu cür ianələrə yalnız marianet Ermənistanın ehtiyacı var. Hələ işğal dövründə ABŞ-ın vaxtilə Qarabağdakı separatçılara minatəmizləmə adı altında ildə 10 milyon dollar vəsait ayırmasını, separatçıların ABŞ-da yardım kampaniyaları keçirib pul yığmalarına şərait yaradılmasını yaxşı xatırlayırıq.

Postmünaqişə dövründə də yenə ayrıseçkilik, ikili standartlar siyasəti davam edir. Belə olan halda təbii ki, ABŞ-ın vasitəçilik rolunu itirməsi qaçılmaz olacaq. Noyabrın 20-də Vaşinqtonda Azərbaycan və Ermənistan XİN başçıları arasında nəzərdə tutulan görüşün baş tutmamasının da səbəbi ABŞ-ın birtərəfli yanaşmasıdır".

Deputat vurğulayıb ki, bu gün dünyanın müxtəlif bölgələrində baş verən siyasi kataklizmlər, müharibələr, dövlət çevrilişləri, vətəndaş müharibələrinin hamısının müəllifi ABŞ-dır: 

"Eyni ssenarilərin Cənubi Qafqazda da reallaşmasına çalışan ABŞ bu regionda heç vaxt sülhün tərəfdarı olmayıb. Bu cür təzyiqlərə rəğmən Azərbaycan öz milli maraqlarına zidd olan bütün mənfi addımları qətiyyətlə və adekvat şəkildə cavablandıracaq.Beynəlxalq hüququn norma və prinsipləri Azərbaycan xarici siyasətində həmişə prioritet olub. Rəsmi Bakı həmişə beynəlxalq öhdəliklərinə uyğun hərəkət edib və bundan sonra da edəcək. Region ölkəsi olmayan ABŞ-ın bütün addımları, davranışları region ölkələrinin nəqliyyat təhlükəsizliyi səylərinə zərbə vurur. Bu gün əslində Cənubi Qafqaz regionunda etimadı sarsıdan da, hərtərəfli sülhə mane olan da ABŞ-dır. Məhz ABŞ-ın diktəsilə hərəkət edən Ermənistanın sülh müqaviləsini imzalamağa iradəsi çatmır".

Xəyal Ramiz