“Fransada bizi həmişə xarici görkəmimizə görə mühakimə edirlər, əgər ağ adamın saqqalı varsa, bu, dəbdə olmasından irəli gəlir, lakin ağ dərilidən başqa hər kəs dərhal “terrorçu” kimi etiketlənir”.
Bu sözləri malili politoloq Kalil Sarmoye Ednews-a açıqlamasında qeyd edib.
O, bildirib ki, bu gün İslam dinindən qorxma, qərəzli yanaşma, müsəlmanlara qarşı irrasional qorxu və narazılığı ehtiva edən islamofobiya anlayışı bəzi qruplar tərəfindən qəbul olunmasa da, xüsusən də Qərb dünyasında 11 sentyabr hücumlarından sonra qanuniləşib:
“Xüsusilə 2015-ci ildə Fransada Çarli Hebdo və Bataklan terror hücumlarından sonra islamafobiya böyük vüsət alıb və mediada “diskurs” olaraq tez-tez istifadə olunmağa başladı.
Müsəlmanlara qarşı hücumların əksəriyyəti dövlət müəssisələrində baş verir və ayrı-seçkiliyin ən şiddətli olduğu qurum kimi dövlət məktəbləri önə çıxır.
Müsəlmanlara qarşı təhsil müəssisələrindəki mövqeyi dövlət qurumlarında tənzimlənənən siyasətlə bağlıdır.
İslamın fransız məktəblərindəki yeri ilk dəfə 1989-cu ildə Parisin şimalında, əsasən müsəlmanların yaşadığı Kreildə orta məktəbdə üç qızın hicablı olması ilə gündəmə gəlib.
Həmən dövrdə saqqallı kişiləri birbaşa "terrorçu" kimi görürdülər. Hazırda da bu belədir. Biz ayrı-seçkiliyə və ədalətsizliyə reaksiya verməsək, bütün cəmiyyət bir-birinə nifrət edəcək”.
Siyasətin islamafobiyanın artımında böyük payı olduğunu vurğulayan politoloq düşünür ki, Fransada yaşayan müsəlmanlar xüsusilə prezident və ümumi seçkilər yaxınlaşdıqca daha çox tənqid hədəfinə çevrilməkdən narahatdırlar:
“İslamofobiyanın artması və bununla bağlı ifrat sağçılara marağın artması Fransada siyasətin parametrlərini dəyişib.
İfrat sağın yüksəlişi bütün siyasi partiyaların daha əhatəli siyasətlər hazırlamasını çətinləşdirir. İctimaiyyətin ifrat millətçi partiyalara marağı, bazasını itirmək istəməyən mərkəzçi partiyaların mühacir əsilli insanlara qarşı ritorikasını sərtləşdirməyə və inklüziv siyasətdən uzaqlaşmalarına səbəb olur. Anti-müsəlman qruplar yeni formalaşan bu siyasi mühiti müsəlmanlara qarşı daha məhdudlaşdırıcı siyasətlər həyata keçirmək üçün fürsətə çevirirlər”.
Politoloq hesab edir ki, islamofobiya ilə mübarizə üçün əvvəlcə təhsil və yüksək məsuliyyət səviyyəsində fərqindəliyin artırılması vacibdir. Fərqli cəmiyyətlər arasında daha yaxşı anlaşmağın təmin edilməsi üçün dialoqları təşvik etmək və önyarğıları azaltmaq önəmlidir.
Həmçinin, media, təhsil müəssisələri və liderlərin bu mövzuda daha məsuliyyətli ritorikası buna böyük təsir göstərə bilər.
Xəyal Ramiz
