Son zamanlar ABŞ-la Azərbaycan arasında soyuq yellər əsir. Buna səbəb isə ABŞ hökümətinin bir-birinin ardınca erməni lobbisinin göstərişlərini icra etməsi olub. Qeyd edək ki, bu hadisələrin fonunda hər iki ölkə arasında rəsmi görüşlər və səfərlər də ləğv olunmuşdu.
Lakin ABŞ Dövlət Departamenti açıqlamasında bildirilib ki, Azərbaycanla əməkdaşlığın dayandırılmasını heç zaman dilə gətirməyiblər. Çünki Azərbaycanla əməkdaşlığı dayandırmaq ABŞ-ın maraqlarına ziddir. Bundan başqa ABŞ Azərbaycanla münasibətlərin normallaşması üçün yeni səfir də təyin edib.
Bəs ABŞ-ın qərəzli çıxışlarından sonra bu cür siyasət aparmasının səbəbi nədir?
Məsələ ilə bağlı politoloq Turab Rzayev Ednews-a açıqlamasında vurğulayıb ki, sonuncu görüşdən sonra ABŞ çalışır ki, Azərbaycanla arasında münasibətləri yumşaltsın:
“Hətta Azərbaycanın yüksək rütbəli rəsmilərinin ABŞ-a səyahət etməsi qadağan olundu. Eyni zamanda ABŞ-ın səfir təyinatı gecikirdi. Həmçinin dövlət departamentindən həm də konqresdən Azərbaycana qarşı qərəzli çıxışlar edilirdi. Bu iki ölkə arasında münasibətlərin xeyli dərəcədə gərginləşməsini göstərir. Çox qəribədir ki, hər il dondurulan 907-ci düzəliş bu səfər dondurulmadı və ABŞ-n Azərbaycana olan hərbi yardımlarına qadağa qüvvəyə mindi. Yəqin ki, bu qadağanın dondurulması və qarşısının alınması çətin olacaq”.
Əlavə olaraq politoloq bildirib ki, ABŞ Rusiyaya qarşı planlarını tətbiq etmək üçün Azərbaycanla əlaqələrini isti tutmalıdır.
“ABŞ-ın bölgə ilə bağlı böyük geosiyasi planları var.
Planlarda isə Qafqaz ölkələri ABŞ-ın yanında yer alır və Rusiyaya qarşı konferentasiya xətti məhz bu regiondan çəkilir. Yəni, Ukraynadan Qafqaza, oradan da Mərkəzi Asiyaya gedən konlikt xətti hazırlanır. Biz bunu paralel olaraq ABŞ-ın Moldova və Ukrayna ilə münasibətlərinin intensiv inkişaf etdirməsindən görə bilərik. Bizdən əvvəl ABŞ Ruminiyaya səfər edib. Həm Ruminiyaya, həm də Ukraynaya yardım müzakirələri aparılıb.
Baltik ölkələri olan Litva, Estoniya Rusiya ilə sərhədləri bağlayır. Finlandiya isə ümumiyyətlə bağlayıb.
Qazaxıstanda NATO təlim mərkəzi açılıb. Özbəkistan Qərblə əməkdaşlığa cəlb olunur. Qırğızıstanda Rusiya və rus dili əleyhinə qərarlar qəbul olunub. Bütün bunlar onu göstərir ki, ABŞ Rusiyanı sərhədə yaxın ərazilərlə çevrələməyə çalışır. Əsasən də Cənubi Qafqazda Ermənistan, Gürcüstan Qərbə xüsusi meyl edir.
Böyük ehtimal ki, Azərbaycana da yaxın müddət ərzində ABŞ və Aİ ilə əməkdaşlıq təklif edəcək”.
Politoloq son olaraq qeyd edib ki, ABŞ-ın hazırda istədiyi odur ki, Azərbaycan Ermənistanla sülh müqaviləsi bağlasın və özünün koalisiyasında birgə Qafqaz olaraq iştirak etsinlər.
Xəyal Ramiz
