Hindistan Ermənistana 600 milyon dollar dəyərində Akaş hava hücumundan müdafiə sistemlərini vermək fikrindədir. Belə bir fikir yeni müharibəni tətikləyə bilərmi? Bu silahların alınmasında Ermənistan niyə bu qədər israrcıdır?
Məsələ ilə bağlı hərbi ekspert Heydər Mirzə qeyd edib ki, Ermənistanın bir patron alması Azərbaycanın daima diqqət mərkəzindədir. O, bu barədə Ednews-a açıqlaması zamanı deyib.
“İlk növbədə onu bildirim ki, Hindistandan Ermənistana son dövrdə bu və ya digər hərbi texnikanın ixrac olunacağı haqda məlumatlar sanki seriala çevrilib. Ard – arda sanki kimsə Hindistanda oturub ayda bir dəfə bu haqda xəbər yayır. İstehzamın səbəbi var - artıq bir ildən artıqdır ki ara sıra bu xəbərlərdə səsləndirilən hərbi texnikanın Ermənistana gəlib çıxması barədə çox ziddiyyətli məlumatlar var. İkincisi odur ki, istehzama baxmayaraq, hər bir halda Ermənistanın bir patron belə alması Azərbaycanın daima diqqətinin mərkəzində olmalıdır. Ümid edirəm ki, hər iki dövlət yaxın bir zamanda yekun sülh sazişinə imza atacaqlar. Lakin dediklərim sülh dövrünə də aiddir. Gələcəkdə aramızda qonşuluq, normal iqtisadi münasibətlər bərpa olunsa da, tədricən arada gediş – gəliş yaransa, hər iki tərəf biri birinin silahlanma məsələlərini diqqətlə izləyəcək”.
Ekspert eyni zamanda qeyd edib ki, 44 günlük müharibə məğlubiyyətindən sonra Ermənistanın öz ordusunu bərpa etmək cəhdi qaçılmaz reallıqdır:
“Orada ümumən elə qoşun növləri var ki, 2020-dən sonra mövcud deyil, nə şəxsi heyət qalıb, nə texnika. Baxın, 2020 və ondan sonrakı əməliyyatlarda erməni tərəfinin nə qədər zenit-raket kompleksi, hava hücumuna qarşı radar qurğusu və s. məhv edildi. Bunların sayı sonsuz deyil. İtkilər isə dəhşətli olub. Buna görə də elə ilk əvvəl başlayıblar hava hücumundan müdafiə qoşunlarından. Lakin məsələnin digər tərəfi də odur ki, dediyim kimi, hər iki tərəf hazırda sülh müqaviləsinə çox yaxındır və bu sülh eyni zamanda bizim də marağımızdadır. Bu səbəbdən, məncə Azərbaycan tərəfi prosesi ilk növbədə diqqətlə izləyir. Bu həm də Ermənistana Fransadan daxil olan silah sistemlərinə də aiddir, bir tək Hindistanın AKAŞ-ı haqda getmir söhbət. Daha güclü tərəf kimi, düşünürəm ki Azərbaycanın məqsədi tez- tələsik bu xəbərlərə reaksiyadan deyil, regionun uzunmüddətli şəkildə bizim maraqlarımıza uyğun və bizim milli təhlükəsizlik görüşlərimizə əsasən formalaşdırılması istiqamətində atılan addımlarda olacaq”.
Əkbər Novruz