Bəzi valideynlər övladlarının hərbi xidmətə getməsini istəmir. Buna səbəb olaraq bir sıra hərbi hissələrdə rast gəlinən əsgərlərə qarşı törədilən zorakılıq, işgəncə hallarını nümunə çəkirlər.
Mövzu ilə əlaqədar hərbi ekspert Ədalət Verdiyev Ednews-a açıqlamasında bildirdi ki, hərbi hissələrdə baş verən psixoloji və mənəvi zorakılıqlarla üzləşən uşaqların valideynləri Müdafiə Nazirliyinin hüquq mühafizə orqanlarına müraciət etməlidirlər:
“Belə hadisələrin statistik göstəriciləri məlum olmadığına görə, həmin halların artmasına dair iddialar səsləndirmək doğru deyil. Amma əgər valideyn övladına qarşı işgəncə və ya hər hansısa təzyiq görürsə bu barədə yuxarı komandanlığa və ya hüquq mühafizə orqanlarına müraciət edə bilər. Güman etmirəm ki, məsələ reaksiyasız qalsın, amma əgər heç bir cavab ala bilməsə mənimlə də əlaqə saxlaya bilər”.
Ekspert həmçinin bəzi Qərbi Avropa ölkələrində olduğu kimi, Azərbaycanda da nə vaxtsa hərbi xidmətin könüllü olması barədə fikir bildirib:
“Bəzi Avropa ölkələrində hərbi xidmət könüllüdür, bəziləri isə müddətli məcburi hərbi xidmət modelinə geri qayıdıb. Azərbaycan həm könüllü, həm də məcburi hərbi xidmət formulusundan istifadə edir. Mövcud şəraitdə bu hələlik Azərbaycan üçün ən optimal rejimdir. Dünyada mövcud olan hərbi təhdidlər, xüsusi ilə regionda baş verən münaqişə, toqquşma, müharibə tamamilə aradan qalxdıqdan sonra Azərbaycan hərbi xidmət haqqında qanunvericiliyə müvafiq dəyişiklər edə bilər. Amma yaxın 10 ildə bu aktual məsələ olmadığından hərbi çağrışdan imtina Azərbaycan üçün məqsədə uyğun deyil”.
Afaq