Avropa İttifaqı Şurası Ermənistandakı müşahidə missiyasının 138 nəfərdən 209 nəfərə qədər genişləndirilməsi barədə qərarı təsdiqləyib. Görünən odur ki, dünyada baş verən proseslər fonunda Ermənistan “manevrlər” etməyə çalışır. Paşinyan hakimiyyəti Aİ-yə sığınmaqla Fransanı regionda tam yerləşdirilməsinə cəhd edir. Hətta xatırlatma olaraq qeyd etmək olar ki, bu missiyanın statusuna dair sazişin imzalanması göstərir ki, əslində bu, mülki deyil, hərbi yönümlü missiyadır.
Azərbaycan Respublikasının keçmiş Xarici İşlər Naziri Elmar Məmmədyarov Ednews – a açıqlamasında məsələni 3 perspektivdən dəyərləndirib:
“Zənnimcə bu qərarı 3 cür şərh etmək olar. Birincisi əlbəttə ki, Avropa İttifaqı istəyir ki, Ermənistanda öz nüfuzunu daha da artırsın. Bu əlbəttə təbii haldır. Çünki qarşılıqlı olaraq Ermənistan höküməti də Aİ – nin burada rolunun yüksək olmasını istəyir. Nəzərə almaq lazımdır ki, Ermənistan höküməti bu qərarı öz xoşluğu ilə qəbul edib”.
Cənubi Qafqaz...
“Onların ikinci fikri Cənubi Qafqazla bağlıdır. İlk növbədə istəyirlər ki, Ermənistanda Rusiyanın nüfuzunu sarsıtsınlar. Üçüncü şərh kimi isə mən şəxsən belə fikirləşirəm ki, hələlik müşahidəçilər silahsız yerləşdirilsə də gələcək zamanda həmin şəxslərin silahlandırılmasını görə bilərik. Düşünürəm proses bu istiqamətdə inkişaf edə bilər”.
Həmsöhbətimiz həmçinin Aİ – nin bu müşahidəçiləri silahlandırılması statusuna da aydınlıq gətirib:
“Doğrudur, Aİ hərbi təşkilat deyil. Lakin təhlükəsizlik baxımından müraciətlər edilə bilər ki, həmin şəxslər özlərini qoruya bilsinlər. Sözsüz ki, bu hadisənin baş verməsi regional sabitliyə öz təsirini göstərə bilər. Qeyd etdiyim kimi nə qədər Aİ bir hərbi təşkilatlanma olmasa da bu cür ehtimalları zənnimcə gözardı etmək olmaz. Ələxsus hər bir formada məsələyə yaxınadan nəzarət etmək lazımdır”.
Əkbər Novruz
