Ukrayna prezidenti Volodimir Zelenski Quru Qoşunlarının komandanı general-polkovnik Aleksandr Sırskini silahlı qüvvələrin yeni baş komandanı təyin edib. O, Valeri Zalujnının yerinə vəzifəyə gəlib. Qeyd edək ki, Zalujnı bu vəzifəni 2022 – ci ilin mart ayından etibarən yerinə yetirir. Bəzi ekspertlərin fikirincə, Ukrayna artıq cəbhədə böyük hesabla uduzur. Bununla da orduda yeni strateji addımların atılması zərurət hesab olunur. 

Maraqlıdır, Ukrayna ordusunda baş komandan dəyişikliyi bu konstruktiv dəyişikliklər fonunda baş verib? Bu müharibənin kursunu dəyişə biləcəkmi? 

Ukraynali hərbi analitik Vadim Tryuxan Ednews – a açıqlamasında bu qərarı olduqca yaxşı qiymətləndirib və hətta Zalujnının prezident olmaq ehtimalını yüksək olduğunu da söyləyib:

“Bir çoxları müharibə gedişatında bu qərarın olduqca pis olduğu fikrində idi. Lakin düşünürəm artıq proses baş verdi və edə biləcəyimiz bir şey yoxdur. Zənnimcə bu yaxşı qərar idi. Zalujnının gələcəyi hazırda qeyri-müəyyən görünür. Çox güman ki, o, de Qollun, Eyzenhauerin, ölkələrində daxili siyasi vəziyyətin çətinliyi və ya ambisiyaları ucbatından prezident olmuş, öz ölkələrində müəyyən islahatlar aparmış digər hərbi rəhbərlərin taleyini təkrarlaya bilər. Yəni onlar kimi özünü siyasi arenada sınayıb, prezidentliyinə namizədlik verə bilər. Hərçənd o, da mətbuatda və ya xalq arasında ona qarşı duyulan pərəstişkarlığı görür. Lakin bunun üçün onun şəxsi ambisiyası lazımdır. Hələlik belə bir anlayış yoxdur. Məsələ ondadır ki, Ukraynada növbəti seçkilərin də nə vaxt olacağı ilə bağlı heç bir anlayış yoxdur. Mənə elə gəlir ki, Zalujnının siyasətə giriş etməsində maraqlı olanların sayı kifayət qədər çoxdur. Düşünürəm ki, o, yalnız Ukraynada daxili siyasi vəziyyətin necə inkişaf edəcəyi bəlli olandan sonra siyasətə gedə biləcək. İlk növbədə cəbhədə baş verəcəkləri nəzərə almaq lazımdır. Seçkilər elan olunan kimi də hər şey müəyyənləşəcək. İnsanların isə ondan Ukrayna prezidenti postuna namizədliyini irəli sürməsi faktiki olaraq şübhə doğurmur”.

Əkbər Novruz