Azərbaycanın xarici işlər naziri Ceyhun Bayramov Almaniyaya işgüzar səfərə gedib.  

Səfər çərçivəsində Azərbaycan və Ermənistan xarici işlər nazirləri arasında “Sülhün və dövlətlərarası münasibətlərin qurulmasına dair ikitərəfli saziş” layihəsi üzrə danışıqların növbəti raundu, habelə Almaniya rəsmiləri ilə görüşlər nəzərdə tutulub. Almaniyanın Azərbaycan-Ermənistan münasibətlərindəki bitərəfliyi gerçəkdirmi?

Mövzu ilə bağlı politoloq Samir Hümbətov Ednews-a açıqlaması zamanı qeyd edib ki, Azərbaycan Ermənistan arasında danışıqlar prosesində Almaniyanın digər Avropa ölkələrə görə daha böyük təsiri ola bilər: 

“Almaniya Fransaya nisbətən neytral və adekvat ölkədir. Bunu Almaniyanın həm Azərbaycanla, həm də Ermənistanla olan siyasi, iqtisadi münasibətlərindən analiz edə bilərik. Almaniya həmçinin kifayət qədər Avropa regionunda nüfuzu olan ölkədir. Eyni zamanda Avropa İttifaqının yaradıcı və ən reputasiyalı ölkəsidir. Bu Almaniyanın Avropa İttifaqı nəzdində problemi həll etmək üçün potensialının olduğunuda ortaya qoyur. Fransa təəssüf ki, bitərəfliyini qoruya bilmədi. Fransanın bitərəfliyini qoruya bilməməsi onu “oyunun” kənarına çıxarıb. Münhendə keçirilən görüşdə də Almaniya kansleri Olaf Şolzun tutduğu mövqe Azərbaycanın mənafelərinə zidd deyil”. 

Politoloq hesab edir ki, bundan sonrada Almaniyanın vasitəçiliyi ilə yenidən ikili görüşlərin keçirilməsi, Azərbaycan və Ermənistan arasında hansısa bir ciddi sənədin imzalanması ilə əlaqələndirilə bilər: 

“Nəzərə almaq lazımdır ki, Almaniya və Azərbaycan arasında da iqtisadi, siyasi və mədəni əlaqələr yüksəkdir. Eyni zamanda Almaniyanın Ermənistanlada isti münasibətləri var. Bu nöqteyi nəzərdən Almaniyanın vasitəçi kimi iştirak etməsi mümkün və daha məqsədə uyğundur”. 

Xəyal Ramiz