Bəşər Əsəd  hakimiyyətdən gedəndən sonra Suriyada yerləşən rus hərbçiləri yeni reallıqla üzləşiblər.

Uzun illər Moskvanın əsas dayaqlarından olan Xmeymim və Tartus bazaları indi yeni şərtlərə uyğunlaşmağa məcburdur. Bu obyektlərin girişləri əvvəllər üsyançı olan “Hayat Təhrir əş-Şam” (HTŞ) qruplaşmasının döyüşçüləri tərəfindən qorunur və rus konvoyları yalnız onların icazəsi ilə bazaları tərk edə bilirlər.

Suriyanın müvəqqəti prezidenti Əhməd Şaraa artıq Rusiya bazalarının icarə şərtlərinin yenidən nəzərdən keçirilməli olduğunu bildirib. Bununla yanaşı, o, Moskva ilə əməkdaşlığı tamamilə dayandırmaq niyyətində deyil. Rusiya üçün bu bazalar Yaxın Şərqdə təsirini qorumağın əsas vasitəsidir və Kreml mövqeyini saxlamaq üçün kompromislərə getməyə hazırdır.

Rusiya nümayəndələri ilə aparılan danışıqlarda Suriyanın milyardlarla dollarlıq borclarının silinməsi, Əsədin gələcək taleyi və hətta Moskva banklarında olduğu iddia edilən Suriya pullarının qaytarılması məsələləri müzakirə olunur. Lakin Rusiya belə hesablardan xəbərsiz olduğunu bildirir.
Bu arada, ABŞ və Avropa İttifaqı Suriyaya tətbiq edilən bəzi sanksiyaları yumşaltsa da, ölkənin iqtisadi vəziyyəti ağır olaraq qalır. Rusiya bundan yararlanaraq silah, yanacaq və ərzaq tədarükü təklif edə bilər.

Moskva həmçinin bazalarını humanitar yardım mərkəzi kimi təqdim etməyə çalışır, lakin bu istiqamətdə hələ ciddi addımlar atılmayıb. Suriyada nüfuz uğrunda gedən geosiyasi mübarizədə Rusiya mövqeyini qorumaq istəyir, lakin əvvəlki şərtlərlə bunu etmək artıq mümkün görünmür.

Fatimə Şükürova//EDnews