Ermənistan prezidenti Armen Sarkisyan Ammanda keçirilən Ümumdünya İqtisadi Forumu çərçivəsində BMT Baş katibi António Guterres ilə görüşüb.

Eurasia Diary bildirir ki, bu barədə Ermənistan prezidentinin mətbuat xidməti məlumat yayıb.

Bildirilir ki, görüş zamanı tərəflər Azərbaycan Prezidenti İlham Əliyev və Ermənistanın baş nazir Nikol Paşinyan arasında 29 mart tarixində Vyanada aparılan danışıqları müzakirə ediblər.

“Ermənistan prezidenti Dağlıq Qarabağ münaqişəsinin həlli üçün BMT-nin, beynəlxalq mandatı olan yeganə format kimi ATƏT-in Minsk Qrupuna dəstək verməsinin əhəmiyyətini vurğulayıb. Sarkisyan və BMT Baş katibi Azərbaycan Prezidenti İlham Əliyevin və Ermənistanın baş naziri Nikol Paşinyanın görüşünü alqışlayıblar və münaqişənin sülh yolu ilə həllinin alternativi olmadığını qeyd ediblər", - deyə prezidentin mətbuat xidmətinin məlumatında deyilir.

Görüşdə BMT və onun strukturları çərçivəsində əməkdaşlığın perspektivləri barədə də fikir mübadiləsi aparılıb.

Xatırladaq ki, İlham Əliyev və Nikol Paşinyan martın 29-da Vyanada Qarabağ münaqişəsinin nizamlanması üzrə ilk rəsmi görüş keçiriblər.