Azərbaycanın birinci vitse-prezidenti Mehriban Əliyeva Bakının Süleyman Rüstəm küçəsində sökülməməsi gündəmdə olan tarixi bina ilə bağlı açıqlama yayıb.
Eurasia Diary Bakupost.az-a istinadən xəbər verir ki, Mehriban Əliyeva məsələ ilə bağlı açıqlamanı özünün "İnstagram" səhifəsində yayıb.
Vitse-prezident bildirib ki, bina ətrafında yaşananlar dövlətin nəzarəti altındadır: "Azərbaycanın və onun paytaxtı Bakının memarlıq və tarixi irsinin qorunub saxlanılması hər birimiz üçün prioritet məsələdir. Onun həlli üçün həm vətəndaş mövqeyi, həm insanların öz doğma şəhərinin simasına biganə yanaşmaması, həm də fəal ictimai nəzarət gərəkdir. Bakının Süleyman Rüstəm küçəsindəki qədim bina ətrafında yaranmış vəziyyət dövlətin nəzarəti altındadır. Ölkəmizin mədəni irsinə xələl gətirilməməsi üçün bütün lazımi tədbirlər görülür, axı unikal və müxtəlif memarlıq abidələri bizim ümumi sərvətimizdir. Ölkəmizi, şəhərimizi doğma evimiz – ümumi evimiz kimi qorumalıyıq".
Qeyd edək ki, artıq bir neçə gündür Bakının Süleyman Rüstəm küçəsi 10 ünvanında yerləşən bina ətrafında qalmamaq yaşanır. Bina 1913-cü ildə tikilib. Uzun illər malakanların ibadət məkanı olub. Hazırda binada bir qrup gəncin yaratdığı "Salaam Cinema” fəaliyyət göstərir. Binanın sahibi olduğunu iddia edən şəxslər isə binanın qəzalı vəziyyətdə olduğunu iddia edir və gəncləri binadan zorla çıxarmağa çalışır. Gənclər binanın sahibkar tərəfindən söküləcəyini iddia edir və söküntüyə etiraz edirlər.