"Biz erməni xalqını döyüşdə məğlub etməsək “Böyük Ermənistan” xəstəliyinə yoluxdurulan bu xalq heç vaxt imkan verməz ki, hansısa hökumət başçısı Azərbaycanın Dağlıq Qarabağ üzərində suverenliyini tanıyan sənədə imza atsın. Heç bunu vasitəçilər də istəmir".

Eurasia Diary-ə bu barədə Milli Məclisin deputatı, BAXCP sədri Qüdrət Həsənquliyev bildirib.

Millət vəkili hesab edir, Azərbaycan mütləq hərbi yolla ən azından Dağlıq Qarabağ ətrafındakı rayonlarımızı azad etməlidir.

"Bunu etməliyik ki, erməni xalqı reallıqla barışsın və Azərbaycanla sülh sazişi imzalasın. Qalan hallarda danışıqlar sadəcə problemin həllini zamanın ixtiyarına buraxmaq və daha əlverişli beynəlxalq şərait gözləmək məqsədi daşıyacaq. Amma mən düşünürəm ki, əlverişli beynəlxalq şəraiti biz özümüz yaratmalıyıq. Biz Qarabağın məskunlaşdırılmasına imkan verməməli, problemin həlli üçün Rusiya ilə hansısa formada anlaşmalıyıq. Rusiyanın Ermənistana dəstəyi olmasa Azərbaycan bu problemi qısa müddətdə həll edə bilər. Bu baxımdan danışıqlardan heç nə gözləməyə dəyməz. Dövlət olaraq müharibə edə bilmiriksə, Mübariz İbrahimov kimi qəhrəmanlarımız şəxsi şücaət göstərməli, düşmənə qan uddurmalıdırlar. Belə qəhrəmanlarımız daha yoxdursa onda ah-nalə edib hökuməti, xalqımımızı qınamamalı, onları yetişdirənə qədər danışıq aparmalıyıq", - deyə Q.Həsənquliyev bildirib.