"Havadan barıt iyi gəlməkdədir” - Deputat: "Ermənistanla haqq-hesabı çürütməyin vaxtıdır" | Eurasia Diary - ednews.net

23 Avqust, Cümə


"Havadan barıt iyi gəlməkdədir” - Deputat: "Ermənistanla haqq-hesabı çürütməyin vaxtıdır"

Siyasət A- A A+

Xəbər verdiyimiz kimi, Ermənistanın xarici işlər naziri Zohrab Mnatsakanyan uruqvaylı həmkarı Rodolfo Nin Novoa ilə birgə mətbuat konfransı zamanı Ermənistanın baş naziri Nikol Paşinyanın "Qarabağ Ermənistandır, və nöqtə" sözlərinə əlavə edəcək bir sözü olmadığını bildirib.

O, jurnalistlərinin məsələylə bağlı  sualına "Baş nazir hər şeyi Ermənistanın mövqeyini açıq şəkildə ifadə edib, əlavə ediləsi bir şey yoxdur. Hər şey Stepanakertdə deyildi. Xarici İşlər Nazirliyi də bəyanatında Xankəndidə deyilənləri təsdiqləyib və onları yenidən səsləndirməyə ehtiyac yoxdur", - deyə cavab verib.

Ermənistanın Xarici İşlər nazirinin bu açıqlamasına Azərbaycan parlamentinin deputatlarının mövqeyini öyrəndik.

Deputat Fəzail Ağamalı Eurasia Diary-ə bildirdi ki, Nikol Paşinyan Xankəndidə bu bəyanatı verdikdən sonra onun aparatından verilən açıqlamad abildirildi ki, baş nazir belə bir fikir söyləməyib:

“Artıq Xarici İşlər Nazirliyi  səviyyəsində bu məsələ bir daha önə çəkilir, Paşinyanın fikri təsdiq edilirsə, birmənalı şəkildə Ermənistanın işğalçı dövlət olduğu görünür. Xüsusi olaraq, problemin həlli versiyasını öz üzərinə götürən Minsk qrupuna həmsədr olan ölkələr Paşinyanın bu bəyanatına birmənalı cavab verməli və müvafiq addımlar atılmalıdır. Sülh danışıqlarının limitinin bitdiyi göz önündədir. Və Minsk qrupu, onun həmsədrləri həqiqətən özlərinə bir dövlət olaraq hörmət edirlərsə, bu cırtdan dövlətin qarşısında aciz deyillərsə, onda Ermənistana ciddi sanksiyalar tədbiq olunmalı və işğalçılığa son qoymaq üçün konkret addımlar atılmalıdır. Əgər bu olmursa, qısa zaman içərisində artıq Minsk qrupuna həmsədr olan ölkələr bunu etmirlərsə, onda təbii ki, Azərbaycan dövləti bütün imkanlarını səfərbərliyə alıb müharibəyə ciddi şəkildə hazırlanmalı və müharibə yolu ilə torpaqlarımızı azad etməlidir. Problem sülh yolu ilə həll olunmursa, onun alternativi müharibədir. Əlbəttə, heç kim istəməzdi müharibə olsun, övladlarımız şəhid olsun, bu müharibədir, qaçılmazdır və müharibənin şərtləridir. Lakin mən dəfələrlə söyləmişəm, bir daha da o fikirdəyəm ki, torpaqlarımızı biz işğal altında qoymalı deyilik. Dəfələrlə dediyim kimi, Ermənistanla, 200 ildən bəri torpaqlarımızı işğal edə-edə gəlib bu günə çatan vandal ölkə ilə nəhayət haqq-hesabımızı çürütməliyik. Və Ermənistanın işğalçılıq siyasətinə nəinki bir dəfəlik son qoymalıyıq, eyni zamanda, onu bir dövlət kimi süründürməli və atmış olduğu addımlarla həmin torpaqlarımıza da bir daha qayıtmalıyıq. Mənə elə gəlir ki, istər ölkə səviyyəsində istərsə də qurumlar səviyyəsində bütün bunlar ciddi şəkildə araşdırılır, götür-qoy edilir, həll olunur və məncə Azərbaycan dövləti yaxın zamanlarda bununla bağlı artıq konkret fikrini bildirəcək. Mənə elə gəlir ki, havadan artıq müharibə, barıt iyi gəlməkdədir”, -deyə Fəzail Ağamalı bildirdi.

Deputat Asim Mollazadə isə hesab edir ki, Paşinyanın məlum sözləri əslində Ermənistanın işğalçı dövlət olduğunun etirafıdır.

“Ermənistan qonşu ölkənin ərazisini işğal edib və Paşinyan da Azərbaycan ərazisini Ermənistana birləşdirmək barəsində bəyanat verib. Əslində bu beynəlxalq təşkilatlar üçün və ilk növbədə ATƏT-in həmsədr ölkələri üçün bir siqnaldır ki, onlar bu məsələ ilə bağlı bilavasitə müdaxilə etməli və beynəlxalq təşkilatlar işğalçıya qarşı müvafiq sanksiyalar təsdiq etməlidir. Paşinyanın bəyanatları bu gün danışıqlar prosesini demək olar ki, əhəmiyyəti itib və bölgədə çox ağır və təhlükəli vəziyyət yaranıb onun qarşısını almaq üçün Ermənistan cilovlanmalıdır. Proseslərin hamısını beynəlxalq hüquq normaları çərçivəsində görmək istəyirik və təcavüzkara qarşı müvafiq, təxirəsalınmaz addımlar atılmalıdır”, -deyə Asim Mollazadə bildirdi.

Vəfa VƏLİYEVA

 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...