“Mən hesab edirəm ki, qardaş ölkənin hərbi bazasının burada olması əlavə kart-blanşdı, yəni Azərbaycan üçün əlavə bir stimuldur. Bu məsələ təcili şəkildə payıza kimi həll olunmalıdır. Yəni Milli Məclisin deputatları tətildən qayıtdıqdan sonra baxılacaq ilk məsələlərdən biri bu olmalıdır”.
Bunu Eurasia Diary-ə açıqlamasında hərbi ekspert Üzeyir Cəfərov politoloq Elxan Şahinoğlunun Azərbaycanda Türkiyənin hərbi bazasının yerləşdirilməsi təklifinə münasibət bildirərkən deyib.
Ekspert hesab edir ki, Ermənistan heç bir halda Azərbaycana qarşı güc nümayiş etdirə bilməz, çünki onun nə iqtisadi göstəriciləri, nə hərbi göstəriciləri, nə də demoqrafik göstəriciləri ölkəmizlə müqayisəyə gələsi deyil.
“Amma buna baxmayaraq, onun arxasında dayanan böyük güclər, konkret olaraq Rusiya, Amerika, Fransa işğalçıya dolayısı da olsa dəstək verirlər. Ona görə də, mən hesab edirəm ki, Azərbaycan öz ərazi bütövlüyünü təmin edilməsi məqsədi ilə NATO-nun aparıcı qüvvəsi olan Türkiyə Silahlı Qüvvələri ilə əməkdaşlıq etməlidir. Naxçıvana görə bizim narahatçılığımız yoxdur, Azərbaycana görə də narahatçılığımız yoxdur. İstənilən halda bu gün Azərbaycan öz müdafiəsini və təhlükəsizliyini təmin edir. Ancaq biz baş verən proseslərin fonunda müəyyən addımlar atmalıdır və o addımlardan biri də Elxan bəyin təklif etdiyi kimi Türkiyə hərbi bazalarının Azərbaycanda yerləşdirilməsidir. O, çox düzgün qeyd edibdir.
Başa düşürəm, indi deyə bilərlər ki, Azərbaycan Qoşulmama Hərəkatının üzvüdür, ancaq hesab edirəm ki, bu Hərəkatın üzvü olan dövlətlər işğalçı Ermənistana təzyiq göstərsəydilər daha yaxşı olardı. Hansısa təşkilatda üzv olmaq olar, o təşkilatın fəalı da olmaq olar, amma gəlin reallıqda çıxış edək, 20 ildən artıqdır beynəlxalq qurumlar, konkret olaraq ATƏT-in Minsk qrupunun həmsədrləri vicdansızlıqla, vaxt itirməklə məşğuldurlar. Baxın görün, Paşinyanın son sərsəm bəyanatlarına indiyə kimi ATƏT-in Minsk qrupunun həmsədrləri zərrə qədər də olsa münasibət bildirmir. Ermənistanın xarici işlər naziri Zöhrab Mnatsakanyan da öz baş nazirinin sərsəm bəyanatını təkrarladı. Yəni baxın görün, dünyada böyük dövlətlər faktiki olaraq qanunla hesablaşmırlar" - deyən hərbi ekspert ona görə də hesab edir ki, Azərbaycan siyasi addımlar atmalıdır:
"Ümumiyytətlə, biz danışıqlar prosesindən çıxmalıyıq. Bu bəyanatlardan sonra bizim hələ danışıqlar prosesində qalmağımız, Ermənistanın guya nə vaxtsa ağıllanacağını düşünmək özümüz-özümüzü aldatmaq deməkdir. Yəni mən bunu bir qədər də radikal formada, sərt formada səsləndirirəm, amma istənilən halda bu, günün reallığıdır. Reallıq da ondan ibarətdir ki, Ermənistanı yerində otuzdurmasan, hələ sabah başqa hoqqalardan çıxacaq, o hoqqalardan ki, onların müdafiə naziri deyir ki, biz müzakirə haqqında düşünməməliyik, artıq yeni ərazilər haqqında düşünməliyik. Göyçə, Zəngəzurdan sonra ermənilərin ağzında şirə qalıb, fikirləşirlər ki, Qarabağ və hələ Qarabağdan da o tərəfə bizim olmalıdır. Amma onların arzuları ürəyində qalacaq. Bu gün Azərbaycan cəmiyyətində bədnam qonşularımızla bağlı çox sərt bir mövqe var. Elxan bəy çox düzgün qeyd edib. Mən hesab edirəm ki, bir qədər də gecikmiş addımdır. Biz bu prosesi sürətləndirməliyik. Çünki mən görürəm ki, bizim cavabdeh şəxslər bir qədər yayın təsirindənmi deyim, ya nədirsə, çox ləng tərpənirlər. Ləng tərpənmək də, heç də xoşagələn mənzərə yaratmır”.
Vəfa VƏLİYEVA