Bakıda Nuru Paşaya heykəl qoyulacaqmı? - Səfir açıqladı - EKSKLÜZİV - FOTOLAR | Eurasia Diary - ednews.net

22 Oktyabr, Çərşənbə axşamı


Bakıda Nuru Paşaya heykəl qoyulacaqmı? - Səfir açıqladı - EKSKLÜZİV - FOTOLAR

Siyasət A- A A+

Xəbər verdiyimiz kimi bu gün Bakının erməni-bolşevik işğalından azad edilməsinin 101-ci il dönümüdür. 1918-ci il sentyabrın 15-də Azərbaycan və Türkiyə əsgərləri Bakını bolşevik-daşnak işğalından azad edərək Azərbaycan dövlətinin tarixinə şərəfli gün yazıblar. Bununla da müstəqilliyini təmin edən Azərbaycanda ermənilərin və bolşeviklərin Bakı və ətraf rayonlardakı ağalığına son qoyulub.

Bu gün Bakının işğaldan azad edilməsinin 101-ci il dönümü münasibətilə  Bakıdakı türk şəhidliyində anım tədbiri keçirilib. Tədbirə Türkiyənin Azərbaycandakı səfiri Erkan Özoral, Azərbaycan millət vəkili Qənirə Paşayeva, Türkiyə və Azərbaycan ordusunun yüksək rütbəli zabitləri, Qarabağ və Kipr qaziləri, hər iki ölkədən olan millət vəkilləri, ictimai xadimlər, dövlət rəsmiləri, ictimai xadimlər, KİV nümayəndələri və s. iştirak edib.

Tədbir Türkiyənin Azərbaycandakı fövqəladə və səlahiyyətli səfiri Erkan Özoralın çıxışı ilə başlayıb. E. Özoral çıxışında şəhidlikdə dəfn edilən Qafqaz İslam Ordusunun əsgərlərinin ruhlarına xitab edib:

“Vətən uğrunda şəhid olan əziz şəhidlər Bakının qurtuluşunun 101-ci il dönümü münasibətilə bu gün bir kərə daha mənəvi hüzurunuzdayıq. Qazandığınız zəfər böyük türk millətinin tarixinə böyük bir dönüş nöqtəsi kimi yazılmış və Azərbaycan Respublikasının bugünkü sərhədləri daxilində var olmasının yolunu açmışdır. Anadoludan gələrək bu torpaqlarda qalan 1130 şəhidimiz bu gün Azərbaycanlı qardaşlarının sevgi və şəfqət dolu sinəsində yatmaqdadır. Ruhları şad olsun! Hamınızın bayramı mübarək olsun!”.

E. Özoralın çıxışından sonra Bakıdakı türk şəhidliyi və Şəhidlər Xiyabanı tədbir iştirakçıları tərəfindən ziyarət edilib.

Tədbirin sonunda E. Özoral Eurasia Diary-nin müxbirinin suallarını cavablandırıb. E. Özoral əvvəlcə bu günün  tarixi əhəmiyyəti və önəminə diqqət çəkib:

“Birinci dünya müharibəsinin sonlarında Osmanlının artıq süqut edəcəyi hər kəsə bəlli idi. Süqutun ərəfəsində olmasına baxmayaraq Osmanlı ən yaxşı əsgər və zabitlərini seçərək Azərbaycana göndərdi, qardaşına yardım əlini uzatdı və Azərbaycanın müstəqilliyi uğrunda mübarizə apardı. Bu bizim bir-birimizə verdiyimiz dəyəri göstərir. Eyni şəkildə Azərbaycan türkləri də Sovet işğalı altındaykən belə Anadoludakı türk qardaşlarına kömək etdi, səylər göstərdi, daim yardım üçün yollar axtardı. İki tərəf də heç bir zaman bir-birinə dəstək olmaqdan çəkinmədi, geri durmadı”.

Səfir həmçinin Türkiyə və Azərbaycan arasındakı münasibətlərin hazırki durumunu da dəyərləndirib:

 “Bu gün də Türkiyə və Azərbaycan bir-birinə güc verən, bir-birindən güc alan iki dövlət oldu. Artıq Azərbaycan Türkiyədə ən böyük xarici investora çevrilib. Türkiyə də öz növbəsində Azərbaycanda ən böyük investisiyalara sahib dövlətlərdən biridir. Azərbaycanda ən çox xarici şirkət Türkiyəyə məxsusdur. Bu bizim bir-birimizə verdiyimiz gücün ən gözəl örnəyidir. Mən bundan sonra iki ölkənin əl-ələ daha da gözəl bir gələcəyə irəliləyəcəyindən əminəm. Azərbaycan və Türkiyə öz regionlarının ən güclü dövlətlərinə çevrilməkdədir. İnanıram ki, daha gözəl bir gələcəyimiz olacaq. Mən bir daha bizə bu bayramı ərmağan edən bütün şəhidlərimizə, qazilərimizə təşəkkür edirəm. Və hamımızın 15 sentyabr bayramını təbrik edirəm”.

Eurasia Diary müxbirinin “Nuru Paşaya Bakıda bu il bir abidə qoyulacaqmı?” sualına E. Özoral, “İnşallah o da olacaq” deyərək cavab verib.

Qeyd edək ki, E. Özoralın bundan əvvəl “inşallah olacaq” dediyi viza məsələsi bir müddət əvvəl həll edilmiş və viza rejimi Azərbaycan tərəfindən ləğv edilmişdi. Bu minvalla qısa zamanda Bakıda Nuru paşanın heykəlini görə bilərik...

  

Nicat İSMAYILOV

1

1

1

1

1

1

Eurasia Diary

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...