Erməni KİV-də yayılan məlumata görə, İrəvanın mərkəzində aparılan təmir işləri nəticəsində müsəlman abidələri aşkarlanıb.

Eurasia Diary xəbər verir ki, bununla bağlı BDU-nun erməni araşdırmaları Elmi tədqiqat və tədris Mərkəzinin Böyük elmi işçisi İsmayıl Tanrıverdi özünün Facebook səhifəsində paylaşım edib.

Gördüyünüz bu tikililər orta əsrlər dövrünün Azərbaycan memarlıq üslubu ilə İrəvan xanı Zal xan tərəfindən tikilmiş "Zal hamamı" və o dövrün məşhur "Zal məscidi"nin uçuqlarıdır. Bu məscid hətta ikinci dünya müharibəsindən sonra ermənilər tərəfindən sərgi zalı kimi istifadə olunmuş və sonralar dağıdılmışdır.

Erməni nazirin mətbuatda yayımladığı statusa cavab olaraq mənim yazdığım şərh isə demək olar ki, bütün şəhər sakinlərini vəlvələyə saldı. Artıq bir gündür ki, mənim yazdığım: "Bütün ermənilər yaxşı birlirlər ki, bu tikililər Azərbaycan xanları tərəfindən tikilmişdir" - şərhimə reaksiya verən ermənilərin sayı hesabı yoxdur.

Ermənilər İrəvan şəhərinin dünyanın ən qədim şəhərlərindən olduğunu və onun 2800 yaşı olduğunu iddia etmələrinə baxmayaraq, bunun ağ yalan olduğuna heç kimi inandıra bilmədiklərini artıq dərk etməyə başlamışlar. Buna görə də yeni uydurma planlar hazırlayaraq həm öz xalqını, həm də beynəlxalq ictimaiyyəti aldatmağa can atırlar.

Bu yaxınlarda mətbuatda belə bir xəbər yayıldı ki, guya şəhərin mərkəzi meydanının lap yaxınlığında maşınların gur hərəkət yerində çökmə nəticəsində yollar bağlanıb və burada təmir məqsədilə aparılan işlər nəticəsində yeraltı qədim tikililər aşkarlanıb. Şəhər meriyası bu tikililərin müsəlman abidələri olduğunu təsdiq edərək dərhal üstünün basdırılmasına qərar verir.

Buna etirazını bildirən bir qrup şəhər sakini buranın təmir olunub "açıq muzey" kimi fəaliyyət göstərməsini tələb etdilər.

Onlar iddia edirlər ki, bununla həm turist axını çoxalar, həm də bütün dünyaya İrəvanın 2800 yaşı olduğunu təsdiq edə bilərik. Maraqlıdır ki, bu kampaniyaya Ermənistanın təhsil, idman və mədəniyyət naziri Arayik Harutyunyan başçılıq edir. Onun müraciətini bugünkü "Tert.am" saytında baş nazir Nikol Paşinyan da dəstəkləmiş və bu ildən bu ərazidə "açıq muzey" tikintisinə başlanması üçün hazırlıq işlərinin aparılacağını bildirmişdir, yalnız maliyyə çatışmazlığına görə bu işlər gecikdirilə bilər.

Əminik ki, tarixçilərimiz dövlətimizin dəstəyi ilə ermənilərin növbəti mənfur niyyətlərinə qarşı mübarizəyə qoşularaq onların bu arzularını gözlərində qoyacaqlar.