“Yaxın perspektivdə Azərbaycan və Avropa İttifaqı arasında yeni bir sazişin imzalanması gözlənilə bilər”.

Bu sözləri EDNews.net-ə politoloq Mətin Məmmədli Azərbaycan Prezidenti İlham Əliyevin yerli televiziyalara veridiyi müsahibə zamanı Azərbaycan-Avropa İttifaqı əlaqələri barədə açıqlamalarını şərh edərkən bildirib.

Söhbət zamanı Mətin Məmmədli Azərbaycan və Avropa İttifaqı arasında əlaqələrin perspektivindən də söz açıb. Politoloq qeyd edib ki, Avropa İttifaqı Azərbaycanla bağlı xarici siyasətini tarazlı şəkildə aparır.

“Prezidentin açıqlamaları İkinci Qarabağ müharibəsindən sonrakı real mənzərəni əks etdirir. Mən bunu bir çox ölkələrin Qarabağ münaqişəsinə, xüsusilə ölkəmizə olan münasibətinə əsasən deyirəm. Prezidentin qeyd etdiyi kimi, ABŞ və Fransadan fərqli olaraq, Avropa İttifaqı, həqiqətən Azərbaycanla bağlı obyektiv münasibət sərgiləyir. Münaqişə və bunun nəticələrinin müzakirəsi ilə əlaqədar Avropa rəsmiləri davamlı şəkildə ölkəmizə səfərdə olub və müəyyən açıqlamalar veriblər. Azərbaycan Avropa İttifaqı ilə bir çox sahələrdə, əsasən siyasi, iqtisadi və enerji sahələrində əməkdaşlıq edir. Avropanın enerji diversifikasiyasında Azərbaycan mühüm yer tutur”.

Politoloq, həmçinin yaxın gələcəkdə Avropa İttifaqı və Azərbaycan arasında strateji əməkdaşlıq sazişin imzalanma ehtimalının olduğunu ehtimal edib.

“Ölkəmiz bu günə qədər Avropa İttifaqı ilə nə assosasiya, nə də strateji əməkdaşlıq sazişi imzalayıb. Gürcüstan və Ukraynadan fərq olaraq, biz assosasiya sazişinə getməyəcəyik. Lakin hal-hazırda Azərbaycan və Avropa İttifaqı arasında strateji əməkdaşlıq sazişi istiqamətində danışıqlar aparılır. Son zamanlar ölkə rəsmilərinin qeyd etdiyi kimi, bu sazişdə bir çox məsələlər artıq razılaşdırılıb. Yaxın perspektivdə hər iki tərəf arasında yeni sazişin imzalanması gözlənilə bilər”.   

Sonda politoloq Pezidentin assosasiya ilə bağlı fikirlərini dəstəkləyib.

“Prezident bu məsələdə təmamilə haqlıdır. Assosasiya sazişini imzalayan ölkələr o qədər uğurlu nəticələr əldə etməyib. Bu sazişin imzalanmasından sonra Ukrayna ciddi siyasi və hərbi təhdidlərlə üzləşib”.

by Yunis Abdullayev