“Milli Məclisdə deputatların sayını artırmaqla yenidən proporsional seçki sistemini tətbiq etmək olar”.

Bu sözləri EDNews-a Ağ partiyanın sədri Tural Abbaslı bildirib.

Söhbət zamanı partiya lideri qanunvericilik və seçki sistemi ilə bağlı dəyişikliklərin aparılmasının zərurətindən söz açıb.

“Azərbaycan ictimaiyyətində bu məsələlər ətrafında müzakirələr uzun zamandır aparılır. Qeyd edim ki, parlamentdə 125 deputat yeri kifayət qədər azdır. 1995-ci ildə konstitusiya qəbul olunduqda Azərbaycan əhalisinin sayı 7 milyon nəfər idi. İndi isə əhali 10 minyondan çoxdur. Düşünürəm ki, 125 deputat 10 milyona insan üçün kifayət deyil. Xalqla ünsiyyətdə olan deputata 50 min civarında və ya artıq seçici düşür. Bir deputatın bu qədər insanla əlaqəyə girməsi və onların problemlərini dinləməsi ağır prosesdir. Gürcüstanın əhalisinin sayı 6 milyon civarındadır, amma deputatlarının sayı bizdən çoxdur. Parlamentimizdə deputatların sayı 155, 175 və ya 200 qədər artırıla bilər. Buna addım atıldığı təqdirdə Azərbaycan qanunvericiliyinin fəaliyyəti normallaşmaya doğru gedər”.

Partiya sədri Azərbaycanda yenidən proporsional seçki sisteminin tətbiq edilməsinin vacibliyini vurğulayıb.

“Xatırladaq ki, 2000-ci ilə qədər Azərbaycanda qarışıq seçki sistemi mövcud idi. Parlamentdə 100 deputat majoritar, qalan 25 nəfər isə proporsional seçki sistemi ilə seçilirdi. 2002-ci ildə konstitusiyada dəyişikliklər aparıldıqdan sonra proporsional seçki sistemi tam aradan qalxdı”.

Tural Abbaslı majoritar seçki sistemində bir sıra neqativ halların mövcud olduğunu da qeyd edib.

“Bu problemlər nədən ibarətdir? Birincisi, pula olan təsadüfü adamlar seçki kampaniyasına pul xərcləyib insanların səsini alır və parlamentə düşürlər. Nəticədə parlamentin fəaliyyəti səmərəsiz olur. İkinci problemə gəldikdə isə majoritar seçki sistemi siyasi partiyaların rolunu azaldır. Proporsional seçki sistemi tətbiq olunarsa, partiyaların siyasi səhnədə fəaliyyəti daha da güclənəcək. Siyasi səhnəyə daha peşəkar kadrlar cəlb olunacaq. Dövlət idarəçiliyi təsadüfü adamlardan təmizlənəcək. Qonşularımız –Türkiyə və Gürcüstanda proporsional seçki sistemi mövcuddur. Regionda yeganə bizim ölkədə majoritar seçki sistemi var. Deputatların sayını artırmaqla ya qarışıq, ya da proposianal seçki sistemi tətbiq edilməlidir”.

Qeyd edək ki, son zamanlar ölkə mətbuatında parlamentdə deputatların sayının artırılması və proposianal seçki sisteminin tətbiqi ilə bağlı müzakirələr aparılır. Çngiz Qənizadə və digər sabiq deputatlar bu məsələ ilə bağlı fikirlərini bildiriblər.

Yunis Abdullayev