Rusiyanın “Sputnik” İnformasiya Agentliyinin Azərbaycandakı nümayəndəliyinə Vitali Denisovun rəhbər təyin edilməsi Marqarita Simonyanın əl-qolunu yaman açıb.
Xatırladaq ki, sayta təyin olunan yeni direktor Vitya əvvəllər qondarma Cənubi Osetiya Respublikasında rəhbər olduğu müddətdə separatçı informasiyalar yaymaqla məşhur olub.
Simonyanın Azərbaycanın ərazi bütövlüyünün əleyhinə köklənən çıxışları yerli media orqanlarında, o cümlədən bir çox iqtidar və müxalifət nümayəndələri arasında “Sputnik” Azərbaycan ofisinin bağlanması ilə bağlı geniş müzakirələrə səbəb olub.
Məsələ ilə bağlı siyasi partiya liderləri də öz mövqelərini bildirməyi labüd biliblər.
Sözügedən situasiya haqqında ilk olaraq Ednews-a danışan "Ağ partiya"nın sədri Tural Abbaslı bildirib ki, dövlətimiz informasiya məkanının təhlükəsizliyinə diqqət yetirməlidir.
“Dünyanın istənilən ölkəsində bu praktika var. Bütün ölkələrdə dövlətin maraqlarına uyğun olmayan informasiya siyasəti aparan KİV-lərin fəaliyyəti qadağan olunur. Adətən belə KİV-lər haradan maliyyələşirsə, hansı ölkənin informasiya vasitəsidirsə, o ölkənin maraqlarını təmin etməyə çalışır. Azərbaycanın bəzi informasiya portallarının Rusiya ərazisində yayımına qadağa qoyuldu. Belə olan halda niyə “Sputnik”in fəaliyyətinə bu cür şərait yaradırıq və bu məsələ ilə bağlı heç bir addım atılmır? “Sputnik” açıq-aşkar Rusiyanın maraqlarını qoruyur və rəhbərlikdə duran insanlarının anti-Azərbaycan mövqeyi məlumdur. “Sputnik Azərbaycan”ın fəaliyyəti dayandırılmalı və ya məhdudlaşdırılmalı, yaxud Simonyanın ordan uzaqlaşdırılması tələbi qoyulmalıdır”.
Müsavat Partiyasının başqanı Arif Hacılı isə hesab edir ki, “Sputnik Azərbaycan” hələ 2020-ci ildə 44 günlük müharibə dövründə bağlanmalı idi.
““Sputnik Azərbaycan” Rusiyanın əsas təbliğat saytlarından biridir və Qarabağ müharibəsi dövründə daim anti-Azərbaycan mövqeyi tutub. “Sputnik Armenia saytı “Artsax eto Armenia” adlandırdığı bir şüarı başlığa qoyub və uzun müddətdir ki, bu başlıq həmin saytda qalmaqdadır. “Sputnik Azərbaycan”ın bağlanmasını biz hələ 44 günlük müharibə dövründə tələb etmişdik. Mən şəxsən başda olmaqla dəfələrlə Müsavat partiyasının nümayəndələri bu məsələni qaldırıb. Dəfələrlə bu saytın məhz anti-Azərbaycan mövqeyinə, Qarabağ məsələsində tutduğu ədalətsiz, haqsız, beynəlxalq hüquq normalarına zidd olan mövqeyinə görə bağlanmasını tələb etmişik”.
Vətəndaş Həmrəyliyi Partiyasının sədri Sabir Rüstəmxanlının sözlərinə görə, “Sputnik Azərbaycan” ilə yanaşı, Azərbaycanın içində kök salan şimaldan, cənubdan jurnalist, mətbuat nümayəndəsi, diplomat adına gələn çoxlu kəşfiyyat agentləri var:
“Bunun qarşısı alınmalıdır. Düşmən ocağının Azərbaycanda nə işi var?! Həmin adamlara, Simonyan kimi tör-töküntülərə qadağa qoyulmalıdır. O bizim içimizdə Rusiya kəşfiyyatına xidmət edən bir adamdır, işçilərinin çoxu da elədir. “Sputnik” bir xəbər agentliyi kimi gəlsə normaldır, biz informasiya məsələsində heç kimə mane olmuruq, amma bilə-bilə ki, bunlar bizim əleyhimizə işləyirlər onları burda niyə saxlamalıyıq ki?”
Qeyd edək ki, bir müddət əvvəl Marqarita Simonyan təxribat dolu açıqlama verərək, təklif edib ki, Qarabağ Rusiyanın tərkibinə verilsin. Bu isə Azərbaycan cəmiyyətində böyük rezonans doğurub.
Gülnar Səlimova
