“Bizim əsas məqsədlərimizdən biri Qarabağ ermənilərini Azərbaycan cəmiyyətinə reinteqrasiya etməkdir. Təbii ki, bu reinteqrasiya prosesinin müxtəlif mərhələləri var. Biz bu mərhələləri ardıcıl şəkildə keçməliyik. İlk növbədə bu bölgədə keçid dövrü üçün hanısa təmaslar qurulmalıdır. Yəni, addım və addım orada qeyri-qanuni və konstitusiyaya zidd olan qurumlar aradan qalxmalı, ölkəmizin qanunları əsasında yerli hakimiyyət orqanları formalaşmalıdır”.
Bu fikirləri Ednews-a danışan siyasi analitik Tofiq Zülfüqarov Qarabağda birgə yaşayış barədə danışarkən deyib. O, qeyd edib ki, bu strateji bir fərqdir.
“Azərbaycan və rus sülhməramlıları arasında təmasların, eləcə də aparılan danışıqların mahiyyəti açıq şəkildə ictimaiyyətə təqdim olunmalıdır. Bununla bərabər, sülhməramlıların reinteqrasiya prosesində bizlərə köməyi düzgün və şəffaf olmalıdır”.
Tofiq Zülfüqarov həmçinin qeyd edib ki, Qarabağda birgə yaşayışa istiqamətlənən təqvim işlənib hazırlanmalıdır. Onun fikrincə, öncə qeyri-qanuni hərbi birləşmələr bölgədən çıxarılmalı, bölgədə təhlükəsizliyi təmin edən müvəqqəti qurumlar yaradılmalıdır. Məhz bundan sonra maliyyə sisteminin tətbiq edilməsi və mülkiyyət məsələlərin həll edilməsi ilə bağlı işlər görülə bilər.
Siyasi şərhçi, həmçinin ictimai qurumların – qeyri-hökumət təşkilatların və media agentliklərin reinteqrasiya prosesinin aparılmasında iştirakını vacib hesab edib.
“Qarabağda qanunları pozmayan və cinayətlərdə məsuliyyət daşımayan ermənilər Azərbaycan vətəndaşları ola bilərlər. Gərək, bu prosesdə ictimaiyyət də iştirak etsin, onlar da öz sözünü deməlidirlər. O biri tərəfə qarşı münasibətin necə olduğu hamımıza yaxşı bəllidir. Qarşılıqlı təmasların qurulması üçün problemlər aradan qalxmalı və həll edilməlidir, belə deyək, prosesin sonunda uğurlu nəticələrin təmin edilməsi faktorlar olmalıdır”.
Yunis Abdullayev
