Türkdilli dövlətlərin əməkdaşlığında növbəti dəfə mühüm və uğurlu tarixi addım atılıb. Belə ki, avqustun 2-də Özbəkistanın paytaxtı Daşkənddə Türkiyə, Azərbaycan və Özbəkistanın XİN rəhbərləri üçtərəfli bəyannaməyə imza atıblar.
Daşkənd bəyannaməsinin əhəmiyyəti nədir?
Politoloq Fikrət Sadıqov imzalanan üçtərəfli bəyannamənin əhəmiyyətini yüksək qiymətləndirib. O, bu barədə Ednews-a açıqlaması zamanı deyib.
Siyasi analitik bu sazişin bir mənalı şəkildə üç dövlətin bir-birinə daha da yaxınlaşmasına təkan verəcək amil hesab edib.
“İlk növbədə qeyd etmək lazımdır ki, Türkiyə, Azərbaycan və Özbəkistan etnik, dini və tarixi baxımdan qardaş dövlətləridir. Əsas bu faktorlar üç dövləti və üç milləti daha da yaxınlaşdırır. Üçtərəfli bəyannaməyə gəldikdə isə hesab edirəm ki, Ankara, Bakı və Daşkənd arasında münasibətlər bundan sonra bütün sahələrlərdə, xüsusilə siyasi, iqtisadi, humanitar və kommunikasiya sahələrində daha da inkişaf edəcək, daha da şaxələnəcək. Hər üç dövlət birlikdə iqtisadi planlar və layihələr həyata keçirə biləcək. Onu da əlavə edim ki, hazırda çox mürəkkəb geosiyasi proseslər fonunda üç türkdilli dövlət tərəfindən belə bir addımın atılması olduqca önəmlidir”.
Fikrət Sadıqonun sözlərinə görə, istər beynəlxalq, istərsə regional məsələlərdə hər üç dövlətin mövqeləri üst-üstə düşür.
“Beynəlxalq münasibətlər sistemində, eləcə də regional təhlükəsizliyin təmin olunmasında Türkiyə, Azərbaycan və Özbəkistan ortaq maraqlar bölüşürlər. Həmçinin, bizim münasibətlərimizin inkişaf etməsi digər türk dövlətlərinə də təsir edərək onları bir alyans çərçivəsində birləşməyə sövq edəcək. Bildiyimiz kimi, artıq Türkdilli dövlətlərin təşkilatı da mövcuddur. Bu, əlbəttə ki, bütün türkdilli dövlətlər arasında qarşılıqlı münasibətlərin inkişafına və dərinləşməsinə öz töhvəsini verir, hətta daha da öz müsbət təsirini göstərəcəkdir”.