Xəbər verdiyimiz kimi, ABŞ Konqresinin Nümayəndələr Palatasının spikeri Nensi Pelosi İrəvana səfər edib. ABŞ rəsmisinin açıqlamaları Azərbaycanda heç də birmənalı qarşılanmayıb və siyasi sferaya da təsirsiz ötüşməyib.

Bu mənada N.Pelosinin açıqlamalarına qarşı politoloqlar, siyasi analtiklər, bir sıra partiya rəhbərləri müxtəlif fikirlər, bəyantlar yayıb, münasibət bildiriblər.

Ednews N.Pelosinin açıqlamalarının Azərbaycan daxili siyasətinə, həmçinin təsirlərilə bağlı bəzi partiyaların mövqeyini təqdim edir.

Milli Məclis sədrinin müavini, İctimai birliklər və dini qurumlar komitəsinin sədri Fəzail İbrahimli:

“Çoxları elə bilir ki, ABŞ Nümayəndələr Palatasının spikeri Nensi Pelosi ermənilər üçün ağlayır, ancaq o elə yaşdadır ki, nə desən ağlayacaq. N.Pelosinin ağlamağı heç bir xeyir vermir, əksinə Ermənistan üçün problem yaradan göz yaşıdır. Onlar ağlamağı bacarmır, şou göstərir. ABŞ-da seçki keçiriləcək, Pelosi erməni lobbisinin səsini almaq üçün Ermənistana gəlib. Bunlar erməni pulu ilə senator seçilir, dolanırlar. Ancaq Pelosinin ağlamaqdan ürəyi gedib orda ölsə də Azərbaycan əsgərləri yerindən tərpənməyəcək”.

Böyük Azərbaycan Partiyasının (BAP) sədri Elşad Musayev:

“Nensi Pelosinin açıqlamaları qərəzli, həqiqətdən uzaq və sərsəm bəyanatdan başqa bir şey seyil. O, əvvəldən də ermənipərəst mövqeyi ilə seçilən adamdır. Qarşıdan gələn seçkilərdə Demokrat Partiyasının ənənəvi erməni diasporunun dəstəyini qazanmaq məqsədi ilə ermənilərə xoş gələn bəyanatlar verir. Eyni zamanda Ermənistanı Rusiyanın təsirindən çıxarıb ABŞ-ın çətiri altına gətirmək məqsədi də açıq görünür.

Biz buna göz yuma bilmərik. Ona görə də, Pelosinin Azərbaycana qarşı əsassız iddialarına və iftiralarına etirazımızı bildiririk.

Azərbaycanın atdığı addımlar beynəlxalq hüquqa uyğundur və biz Pelosi kimilərin sarsaq bəyanatına baxmayaraq düşməni sülhə məcbur edəcəyik”.

Ağ partiyanın sədri Tural Abbaslı:

“Nensi xanım, Amerikada erməni lobbiçiliyini aparan əsas adamlardan biridir. Dönəm-dönəm də Azərbaycan əleyhinə çıxışları olan, qətnamələrin və digər səbəblərin müəllifi görünürdü.

Yəni, onun səfərdəki çıxışları gözlənilən idi. İndiki məqamda Nensinin dediyi bəyanətlarını tək onun öz adından yox nümayəndələrinin adından – yəni Amerika dövlətinin mövqeyi kimi görürürk. Bu ikili standartların qərazlı mövqeli çıxışlarıdı. 30 illik işğal altında qalan torpaqlarımız, talan edilən şəhərlərimiz, Xocalı soyqırımımız, hələ də 4 minə yaxın itkin və girov düşmüş insanımızın taleyi bilinmir. Bütün bunlar qalıb kənarda, Nensi xanım Azərbaycanın özünün təhlükəsizliyini təmin etmək üçün atdığı addımlara təcavüz deyir.

Dünyanın müxtəlif qütblərində duran düşmənləri belə Azərbaycana qarşı eyni mövqedən çıxış edir. Ən azından Amerika, İran, Rusiya, Avropa birliyi. Bunlar ayrı-ayrılıqda bir-birini qəbul eləməsə də Azərbaycana qarşı qərazlı mövqedə çıxış edirlər.

Belə anlarda nəticələr çıxarmalıyıq. Heç də kor-koranə dünyanın ədalətinə, yaxud da demokratiya nağıllarına inanmamalıyıq.

Nensi xanım, dırnaq arası xanım deyirəm, ağzına gələni danışması təhküəli deyil, nəyinki bizim daxildəki xainlərin çıxşıları, mövqeləri”.