Meksikanın xarici işlər naziri Marselo Ebrard BMT Təhlükəsizlik Şurasını sərt tənqid edib. 

 

Ednews "aa.com"-a istinadən xəbər verir ki, o, Rusiyanın Ukraynaya qarşı müharibəsini qeyri-adekvat idarə etdiyini bildirib. 

 

BMT Baş Assambleyasının 77-ci sessiyasında çıxış edən Ebrard müharibənin “qlobal nizama ciddi təsirləri” üzərində xüsusi dayanıb. Müharibə başlayandan bəri beynəlxalq sülh və təhlükəsizliyin, iqtisadiyyatın, əsas məhsulların tədarükü və ərzaq təhlükəsizliyinin kökündən pisləşdiyini qeyd edən prezident, təcavüzün dayandırılmasında BMT Təhlükəsizlik Şurasının səylərinin səmərəsiz olduğunu vurğulayıb.

 

“Təhlükəsizlik Şurası müharibənin qarşısını ala bilmədiyi üçün BMT Nizamnaməsinin ona verdiyi mandatı yerinə yetirə bilməməklə yanaşı silahlı təcavüzü dayandıracaq tədbirləri də həyata keçirə bilmədi. Təhlükəsizlik Şurası dialoq və ya danışıqlar yolu ilə həll yolu axtarmaq üçün heç bir diplomatik prosesə başlaya bilməyib”,- deyə Ebrard bildirib.

 

Ebrardın sözlərinə görə, Təhlükəsizlik Şurası humanitar yardımı, Rusiya və Ukrayna tərəfindən istehsal olunan taxıl, gübrə bazarlarına çıxışı təmin edə bilməyib.

 

“Münaqişələrin sülh yolu ilə həllinin təşviqinə sadiq olan məsuliyyətli ölkə kimi Meksika bu assambleyada Ukrayna üçün dialoq və sülh təklifi ilə iştirak edir”, - deyə o bildirib.

 

Meksika prezidenti Andres Manuel Lopez Obrador tez-tez üçüncü tərəflərin müharibə edən qonşular arasında münaqişədə vasitəçilik edəcəyi bir komissiyaya ehtiyac olduğunu bildirib.

 

Lopez Obrador deyib ki, komissiyaya BMT-nin baş katibi Antonio Quterreş, Hindistanın baş naziri Narendra Modi və Roma Papası Fransisk rəhbərlik etməlidir.

 

“Meksika prezidenti hər birimizin məsuliyyətini dərk edərək, dövlət və hökumət başçılarından ibarət qrupun yaradılmasını təklif edib. Bu da baş katibin səylərini dəstəkləyəcək və ölkələr arasında etimadın möhkəmləndirilməsi tədbirlərini daha da inkişaf etdirəcək.”, - Ebrard əlavə edib. 

 

Nəzrin Beydiyeva

 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary