Üzvlərinin sayı 4500 nəfərdən az olan partiların qeydiyyatı ləvğ edilə bilər.
Layihəyə əsasən, dövlət qeydiyyatına alınan siyasi partiyada üzv sayı 4500-dən aşağı olduqda müvafiq icra hakimiyyəti orqanının müəyyən etdiyi orqan (qurum) siyasi partiyanın ləğvi barədə apellyasiya məhkəməsində iddia qaldıra bilər.
Gözlənilən yeni qanun layihəsi ilə bağlı Ednews bəzi partiya sədrlərinin fikirlərini öyrənib.
Müasir Müsavat partiyasının sədri Hafiz Haciyev hesab edir ki, siyasi partiyaların üzvlərinin 5000-dən aşağı olmamalıdır.
“Qanun layihəsində təqdim olunan bu maddə çox doğru qərardır. Əgər bir partiyanın üzvlərinin sayı 4000-dən aşağıdırsa, o partiyanın fəaliyyət göstərməsi mənasızdır. Üzvlərinin sayı aşağı olan partiyalar siyasi ictimaiyyətə heç cür təsir
edə bilməz. Müasir Müsavat partiyasının üzvlərinin sayı 100 minə yaxındır. Yalnız 54 min üzvə partiya bileti vermişik. Partiyanın qərargahında həmin şəxslərin mobil və ev telefonları, passportalarının seriya nömrələri haqqında sənəd tərtib edilib. Hesab edirəm ki, qanunda hər bir partiyanın üzvlərinin zəruri sayı 5000 -ə qaldırılmalıdır. Partiyaların çox olması demokratiya demək deyil. Dövlətçiliyin və xalqımızın gələcəyi naminə münasib konsepsiyalar irəli sürən 15 və ya 20 partiyanın fəaliyyəti bəs edər”.
Azərbaycan Liberal Partiyasının sədri Əvəz Temirxanlı həmkarından fərqli olaraq belə bir maddənin heç bir siyasi inkişafa aparmayacağını bildirib. Onun sözlərinə görə, qanun layihəsində demokratiyaya zidd olan maddələrin yer alması ölkədə azad siyasi fəaliyyətə əngəllər yaradacaq.
Azərbaycan Demokratik İslahatlar Partiyasının sədri Asim Mollazadə daha fərqli münasibət bildirib.
“Milli Məclisin növbəti plenar iclaslarında bu qanun layihəsi ilə bağlı hələ müzakirələr davam edəcək. Məsələ barədə geniş fikir mübadiləsinin aparılmasına ehtiyac var. Qanun layihəsində istənilən maddə ilə bağlı, xüsusilə üzvlərinin sayı və məhkəmə qərarı haqqında yeni dəyişikliklər edilə bilər. Qanun layihəsinin qəbulundan sonra partiyalar bu haqda öz münasibətini bildirəcəklər. Bu məslə yaxın zamanda daha aydın olacaq”.
Yunis Abdullayev