“Azərbaycan və Ermənistan arasında imzalananması gözlənilən sülh müqaviləsinin şərtləri gizli saxlanılmalıdır”.

Bu sözləri Rusiya XİN-in mətbuat katibi Mariya Zaxarova jurnalistlərə açıqlamasında Azərbaycan-Ermənistan münasibətləri ətrafında gedən son prosesləri şərh edərkən bildirib.

Məsələyə münasibət bildirən bəzi ekspertlər Zaxarovanın bu sözlərini xoş qarşılanmayıb.

Politoloq Tofiq Zülfüqarov Ednews-a açıqlamasında qeyd edib ki, Bakı və İrəvan arasında sülh müqaviləsinin şərtləri imza mərasimindən əvvəl hər iki ictimaiyyətə açıqlanmalıdır.

“Mən sülh müqaviləsinin şərtlərinin açıqlanmasının tərəfdarıyam. Hər iki dövlət arasında imzalanacaq sülh müqaviləsi birbaşa hər iki xalq arasında sülhün, barışığın və əmin-amanlığın bərqərar olunmasına istiqamətlənib. Hər iki cəmiyyətin nümayindələri sazişin şərtlərinin nədən ibarət olduğunu bilməlidir. Belə olan halda hər iki xalq məsələni daha aydın başa düşəcək. Sazişin şərtlərinin gizli saxlanılması prosesin uzadılmasına xidmət edir və bir çox problemlərə gətirib çıxara bilər. Buna görə də Rusiyanın yanaşması qəbuledilməzdir”.

Politoloq İlyas Hüseynov da həmkarı ilə eyni fikirləri bölüşüb.

Onun sözlərinə görə, Rusiya rəsmilərinin sülh müqaviləsi barəsində fikirləri regionda geosiyasi reallıqlar ilə ziddiyyət təşkil edir.

“Siyasətçilər keçirilən danışıqlar ilə bağlı bəyanatlar verməlidirlər. Çünki  hər iki toplum nəyə getdiyini və nə qazandıqlarını bilməlidirlər. ATƏT-in Minsk Qrupunun çərçivəsində bu günə kimi keçirilən danışıqlar əsasən gizli saxlanırlırdı. Vasitəçilər məxfiliyin saxlanılmasının tərəfdarı idi. Lakin Prezident İlham Əliyev Vətən müharibəsinin gedişində bir sıra deyilməyən məsələləri Azərbaycan xalqına çatdırdı. Bu gün də bu yanaşmanın irəli sürülməsi qəbul olunan deyil. Biz görürüq ki, Avropa İttifaqının vasitəçiliyi ilə keçirilən danışıqlardan sonra bəyanatlar qəbul olunur. Bu bəyanatlarda bir sıra regional məsələlər ilə bağlı  müddəalar qeyd olunur. Bununla, hər iki toplum danışıqlardan agah olur”. 

İlyas Hüseynov, həmçinin qeyd edib ki, Avropa İttifaqının vasitəçiliyi ilə keçirilən danışıqlar daha səmərəlidir və nəticə yönümlüdür.

“Rusiya rəsmilərinin sülh müqaviləsi ilə bağlı fikirləri Qafqazda hazırki gesiyasi vəziyyət ilə uyğunluq təşkil etmir. Regionda yeni reallıqlar yaranıb və yeni yanaşmalar formalaşdırılıb. Sülh prosesində hır hansı məsələ məxfi saxlanılmamalıdır”.

Yunis Abdullayev