Qarabağda müvəqqəti yerləşdirilmiş rusiyalı sülhməramlıları mandatlarına zidd daha bir addım ataraq 14 xarici ölkə vətəndaşının Azərbaycan ərazisinə keçidini təmin ediblər.
Sosial şəbəkələrdə gəzən məlumata görə, Qarabağ ərazisinə buraxılan 14 nəfər İran İslam Respublikasının vətəndaşlarıdır. Onlar noyabrın 24-ü günorta saat 13-14 radələrində eyni avtomobildə sülhməramlıların postunu keçərək Xankəndiyə gəliblər və hazırda oradadırlar. Qəribədir ki, 14 nəfərdən 12-si İranın eyni bölgəsindən - ölkənin cənub-qərbindəki İzeh şəhərindəndir. Qeyd edək ki, İzehin daxil olduğu Xuzistan vilayətinin əhalisi arasında ermənilər çoxluq təşkil edirlər və burada əsas işlək dillər arasında erməni dili də var.
Bəs bu 14 nəfərlik qrup Azərbaycanın Qarabağ bölgəsinə niyə gəlib və bu gizli səfərin məqsədi nədir?
Məlumata görə, iranlılar rusiyalı sülhməramlıların müvəqqəti nəzarəti altında olan ərazilərdə özünü çox rahat hiss edən qanunsuz terrorçu dəstələrə terror-diversiya təlimləri keçmək və konkret diversiyalar hazırlamaq üçün göndəriliblər. Bundan başqa, onların Qarabağda qalmış terrorçu dəstələrə İran istehsalı olan silah-sursatdan istifadə üçün təlim keçə biləcəkləri də deyilir.
Ednews-a danışan politoloq Yeganə Hacıyevanın sözlərinə görə, İran Qarabağda terorçulara hərbi təlimlər keçmək istəyir:
"Son iki ay ərzində Azərbaycan-İran arasında gərginləşən münasibətlərdə ard-arda İranın bizə qarşı atdığı addımlar var. Onlardan da biri guya İran təhlükəsizlik qüvvələrinin yəni, SEPAH-ın məhz Ermənistan polisinə təlim keçməsi barədə razılığı oldu. Bu razılaşma təxminən Paşinyanın İrana səfəri zamanı qərarlaşdırılıb. Görüşdən iki həftə sonra bu mediaya açıqlandı. Guya SEPAH Ermənistan polisinə özünü müdafiənin yolların öyrədəcək. Əsas da SEPAH-ın öyrədə biləcəyi, etirazları necə yatırmaq məsələsi. Demokratiya çətiri altına sığınan Paşinyanın etirazları necə yatırılmasında SEPAH-ın təcrübəsindən faydalanması ayrı bir mövzudur. Bütün dünyada bu məsələ barədə heç danışılmadı. Digər bir məqam isə SEPAH-ın polis deyil, hərbi qüvvələrə də təlim keçəcəyi məsələsidir. İndi biz o prosessin özünü görürük”.
Politoloqun sözlərinə görə İran Rusiya sülhməramlıları ilə paralel olaraq Azərbaycan ərazilərində terorçulara hərbi təlim keçəcək. Rusiya bunu gizli edirsə, İran açıq şəkildə bunu edir.
“İran bütün dünyada və öz qonşularında da şiə əhalisi olan istənilən yerdə də teror qrupları formalaşdırması üzrə çox böyük təcrübələri var. SEPAH indi də erməniləri bir neçə istiqamət üzrə təlimatlandırır. Bu təlimatlardan biri onların birgə müştərək media mərkəzinin qurulmasıdır. SEPAH Azərbaycana ermənilərdən daha çox bələddir. Onların burada güclü şəbəkələri var. Dövlət Təhlükəsizlik Xİdmətinin də son vaxtlarda onları ifşaladığını görürük.
İlin sonuna qədər Ermənistan 3 tərəfli razılaşmanın bəndlərini yerinə yetirməsə Azərbaycan Qarabağda anti-teror əməliyyatlarına başlaya bilər. Beləliklə biz yerinə yetirilməyən bəndləri özümüz yerinə yetirəcəyik".
Əbülfət Baxşəli
