Sosial şəbəkələrdə yayılan məlumatlara görə, Şuşa yaxınlığında azərbaycanlı jurnalistlər rus sülhməramlıların kobud rəftarı ilə üzləşiblər, hətta onlara təhdidlər edilib və yolları bağlanılıb.
Sülməramlıların kobud hərəkətləri və davranışları Azərbaycan ictimaiyyətində birmənalı qarşılanmayıb.
Məsələ ilə bağlı Ednews-a açıqlamasında politoloq Cümşüd Nuriyev qeyd edib ki, sülhməramlılardan növbəti təxribat xarakterli hərəkətlərinin qarşısının alınması üçün advekat addımlar atılmalıdır.
Onun sözlərinə görə, təkcə dövlət səviyyəsində yox, həmçinin media orqanları səviyyəsində də məsələyə münasibət bildirilməlidir.
“Rus sülhməramlıların tərbiyəsiz və özbaşına hərəkətlərinə son qoymaq lazımdır. İlk növbədə Azərbaycan Mətbuat Şurasında jurnalistlərimizə kobud rəftar və təhdid edilməsi ilə bağlı bəyanat verilməlidir. Şuraya üzv olan media və ictimai orqanların rəhbərləri öz sözünü deməlidirlər. Eyni zamanda Medianın İnkişafı Agentliyi də öz mövqeyini ortalığa qoymalıdır. Bununla yanaşı, Milli Məclisin İnsan Hüquqları komitəsində jurnalistlərimizin hüquqlarının pozulması ilə bağlı müzakirələr və dinləmələr aparılmalıdır. Daxili İşlər Nazirliyinin rəsmiləri də Qarabağa səfər edən media orqanların əməkdaşlarının, eləcə də adi vətəndaşların təhlükəsizliyinə cavabdeh olmalıdır. Sonda Müdafiə Nazirliyi məsələyə müdaxilə edərək sülhməramlıların rəhbərliyinə bildirməlidir ki, onların vəzifəsi təkcə erməniləri qorumaq deyil. Azərbaycan vətəndaşlarının öz doğma torpaqları – Xankəndinə və Qarabağın digər ərazilərinə səfərləri təmin edilməlidir. Sülhməramlıların nalayiq hərəkətləri qanunlarımızın kobudcasına pozulması deməkdir”.
Politoloq, həmçinin vurğulayıb ki, Azərbaycan tərəfi rus sülhməramlıların missiyasının başa çatması istiqamətində ciddi tədbirlər görə bilər.
“2020-ci ilin noyabrın 10-da imzalanan üçtərəfli bəyanat Azərbaycan və Ermənistan tərəfindən ratifikasiya olunmayıb. Rus sülhməramlıların BMT-nin sülhməramlı qaydalarına uyğun olan heç bir mandatı yoxdur. Beynəlxalq hüququn prosedur qaydalarına görə, hər hansı dövlətlərarası razılaşma tərəflər arasında altı ay ərzində ratfikasiya olunmursa, həmin sənəd öz hüquqi qüvvəsini itirir. Belə olan təqdirdə Azərbaycan üçtərəfli bəyanatdan birtərəfli qaydada geri çəkilə bilər. Ermənistanın Rusiyadan uzaqlaşdığı halda Azərbaycan hansı səbəblərə görə bu ölkənin ordusunu öz ərazisində saxlamalıdır? Biz nə qədər rus hərbiçilərinin həyasızlıqlarına dözməliyik? Sülhməramlılar üzərinə düşən öhdəlikləri və vəzifələri yerinə yetirmir, sülhdən başqa hər hoqqa ilə məşğuldurlar, məqsədyönlü şəkildə münaqişəni alovlandırırlar. Bütün bu problemlərin həll edilməsindən ötrü Azərbaycan Xarici İşlər Nazirliyi BMT-nin Təhlükəsizlik Şurasına müraciət etməlidir. Bu rus qoşunlarının ərazilərimizdən çıxarılması üçün ən doğru addım olar”.
Yunis Abdullayev