“Sülhməramlılar təbii sərvətlərimizin talan olunmasında birbaşa iştirak edirlər” - Politoloqdan ŞƏRH - ednews.net

5 Fevral,

(+994 50) 229-39-11

“Sülhməramlılar təbii sərvətlərimizin talan olunmasında birbaşa iştirak edirlər” - Politoloqdan ŞƏRH

Siyasət A- A A+

“Təəssüflər olsun ki, rus sülhməramlılarının müvəqqəti nəzarəti altında olan ərazilərimizdə faydalı qazıntıların və təbii sərvətlərimizin separatçılar tərəfindən qanunsuz istismarı davam edir”.

Bu sözləri Ednews-a açıqlamasında politoloq Tural İsmayılov Xocalıda Ekologiya və Təbii Sərvətlər Nazirliyi, eləcə də digər dövlət orqanları ilə rus sülhməramlıların rəhbərliyi arasında gedən danışıqların nəticələrini şərh edərkən bildirib. 

Söhbət zamanı o, qeyd edib ki, rus sülhməramlıları sərvətlərimizin talanmasına şərait yaratmaqla özlərinin də bu qanunsuz işlərdə iştirak etdiklərini etiraf etmiş olurlar.

“Təbii sərvətlərimizin qanunsuz istismar olunmasına birmənalı şəkildə son qoyulmalıdır. İki il keçməsinə baxmayaraq, nə rus sülhməramlıları, nə də Ermənistan hakimiyyəti üçtərəfli bəyannamənin mühüm müddəalarını yerinə yetirmirlər. Nəzərə almaq lazımdır ki, rus sülhməramlıları indiyə qədər Qarabağ ermənilərinin Azərbaycan cəmiyyətinə inteqrasiya prosesinə heç bir töhfə vermirlər. Ərazilərimizdə faydalı yataqların qanunsuz istismarına imkan verməklə Qarabağda separatçıların əhval-ruhiyyəsini daha da artırırlar”. 

Politoloq Azərbaycan hökumətinin yaxın zamanda bu istiqamətdə atacağı ciddi addımları xüsusi olaraq vurğulayıb.

“Hesab edirəm ki, Azərbaycan dövlət orqanlarının səlahiyyətli və vəzifəli şəxslərinin Xocalıya daxil olmaları və məsələ ilə bağlı sülhməramlıların rəhbərliyinə xəbərdarlıq etmələri ciddi addımlardır. Lakin təbii sərvətlərimizin qarət olunması dayanmazsa, monitorinqlər nəticəsində ortaya çıxan pozuntuların və qanunsuzluqların qarşısı alınmazsa, Azərbaycan həmin ərazilərdə növbəti anti-terror əməliyyatları həyata keçirmək məcburiyyətində olacaq”.

Tural İsmayılovun fikrincə, rus sülhməramlılarının qeyri-obyektiv davranışları və hərəkətləri Azərbaycan hakimiyyətini sülhməramlıların vaxtından əvvəl ərazilərimizi tərk etməsi ilə bağlı məsələ qaldırmağa vadar edə bilər.

“Bu hüquq Azərbaycanın siyasi gündəliyində daima qalır. Proseslərdə müsbət yönümlü dəyişikliklər baş verməzsə, bu addımın atılmasına gedə bilərik”.

Yunis Abdullayev



Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...