Mixail Aleksandrov və Aleksandr Başkindən sonra Rusiyanın növbəti rəsmisi – Rusiya Federasiyası Raket və Artilleriya Elmləri Akademiyasının sədrinin müavini Konstantin Sivkov Azərbaycanı təhdid edib.
O, mətbuata müsahibəsində qeyd edib ki, Rusiya Ukrayna ilə məsələni həll etdikdən sonra Azərbaycanla məşğul olacaq.
Onun sözlərinə görə, Azərbaycan Türkiyə və ABŞ-ın təhriki ilə Rusiya üçün ciddi təhlükə yaradır, Moskva bunu unutmayacaq.
Məsələ ilə bağlı Ednews-a açıqlamasında sabiq XİN rəhbəri, politoloq Tofiq Zülfüqarov bildirib ki, Rusiya rəhbərliyində erməni lobbisinin maraqlarına xidmət edən və müxtəlif mövqeli siyasi dairələr var. Söhbət zamanı o, qeyd edib ki, həmin dairələrin Azərbaycanla bağlı münasibəti və baxışları fərqlənir.
“Onların bu günlərdə belə fəallaşması erməni lobbisinin təsirindən irəli gəlir. Biz başa düşməliyik ki, Ermənistan və erməni millətçiləri Rusiya ilə Azərbaycan arasında münasibətləri korlamaq, hər iki dövlətin bir-birinə qarşı qarşıdurmaya getməsi üçün bütün vasitələrdən istifadə edirlər. Azərbaycan rəhbərliyi bunu çox yaxşı anlayır və bu mövzunu daimi diqqətdə saxlayır. Təbii ki, bir çox hallarda bu cəhdləri neytrallaşdırmaq üçün imkanlar mövcuddur. Bundan isə müvafiq dövlət orqanları məşğuldur”.
Tofiq Zülfüqarov Qarabağda rus sülhməramlıların öz fəaliyyətlərini razılaşdırılmış şəkildə həyata keçirməsinin zəruriliyini vurğulayıb.
“Hazırda Azərbaycan rəhbərliyi Qarabağ ermənilərinin cəmiyyətimizə yenidən reinteqrasiyası istiqamətində ciddi tədbirlərin görülməsi ilə məşğuldur. Biz istəyirik ki, rus sülhməramlıları ermənilərin reinteqrasiyası prosesində bizim yanımızda olsunlar və öz fəaliyyətlərini məhz bu çərçivədə sürdürsünlər. Bundan başqa heç bir alternativ yoxdur. Əgər rus sülhməramlıları bu işdə bizə maneçilik törətməyə çalışsalar, o zaman Azərbaycan və Rusiya arasında münasibətlər kəskinləşəcək. Bizimlə reinteqrasiya prosesinə cəlb olunmaq Rusiyanın marağında olmalıdır. Regionda hazırki geosiyasi vəziyyəti nəzərə alaraq Azərbaycan bu istiqamətdə tələblərini irəli sürür. Rus sülhməramlıları ya reinteqrasiya prosesində bizə yardımçı olacaqlar, ya da onların fəaliyyət priotetləri müəyyən çərçivədə məhdudlaşacaq”.
Bir çox ekspertlər kimi Tofiq Zülfüqarov da Rusiyanın bəzi dairələrinin regionda təxribat törətməkdə maraqlı olduğunu bildirib.
“Təkcə Rusiya və Ermənistan yox, həmçinin bəzi Qərb dairələri, xüsusilə Fransa proseslərə açıq şəkildə müdaxilə edir və erməni maraqlarına uyğun təbliğat aparır. Fransada, eləcə də Avropanın bəzi ölkələrində təbliğat aparılır ki, guya Qarabağda ciddi humanitar böhran yaşanır. Ərazilərimizdə siyasi vəziyyətin gərginləşməsi üçün Rusiya və Qərbdə bəzi dairlər əlindən gələni edir. Ancaq onların təxribatları və təhdidləri bizi qorxuda bilməz. Azərbaycan ordusunun elit bölmələri Qarabağda təxribatların qarşısının alınması və təhlükəsizliyinin təmin edilməsi istiqamətində lazımi işlər görür”.
Tofiq Zülfüqarov, həmçinin Rusiyanın Xəzərdə Azərbaycan və Türkmənistan arasında qaz əməkdaşlığına münasibəti barədə fikir bildirib.
“Hesab edirəm ki, Xəzər regionunda siyasi vəziyyət 90-ci illərdəkindən fərqlidir. İndiki zamanda Azərbaycan və Rusiya arasında ikitərəfli əməkdaşlığın bir çox sahələri mövcuddur. Həm Bakı, həm də Moskva birgə xüsusi enerji layihələri həyata keçirir. O ki qaldı Aleksandr Başkinin fikirlərinə, onun kimi erməni diasporasının maraqlarına xidmət edən rus siyasətçiləri yalnız Azərbaycan-Rusiya münasibətlərinin korlanmasına xidmət edirlər”.
Yunis Abdullayev
.jpg)
