Hazırda MDB-nin Sankt-Peterburqda keçiriləcək qeyri-rəsmi sammitində Azərbaycan prezidenti İlham Əliyevin və Ermənistanın baş naziri Nikol Paşinyanın görüşü keçiriləcək. Bu görüşün Qarabağ məsələsinə təsiri necə olacaq? Sülh müqaviləsi reallaşa bilərmi?
Ednews bu barədə tanınmış politoloqların şərhini öyrənib. Cavabları təqdim edirik.
Politoloq Amid Əliyev:
“Bir neçə gün öncə üç ölkə XİN rəhbərlərinin baş tutmalı olan görüşün Ermənistan tərəfinin görüşdən imtina etməsi görüşün mahiyyətini azaltmadı, əksinə Azərbaycan tərəfindən siyasi mesajların verilməsi üçün önəmli platforma oldu.
XİN rəhbərləinin görüşü əslində elə bu günkü görüşü üçün hazırlıq kimi də qiymətləndirilə bilər. Azərbaycan tərəfindən Laçın dəhlizi vasitəsilə silahların daşınması, 3-cü ölkə vətəndaşlarının Bakı ilə razılaşdırılmadan əraziyə girişi və təbii ehtiyatların talan edilməsi kimi faktlara Azərbaycanın güzəştə getməyəcəyi barədəki prinsipial mövqeyi aydın sezilir. Bununla yanaşı Vardanyan tərəfindən Azərbaycana qarşı təhdid dolu ritorika ilə xitab etməsi də Azərbaycan tərəfini narazı salan məqamlardandır.
Çox güman ki, Azərbaycan dövlət başçısı hər iki ölkə rəhbərləri ilə görüşdə məhz bu elementləri masaya qoyacaq. Rəsmi Moskva Azərbaycanın bu tələbləri ilə razılaşmalı və öz mövcudluğunu bölgədə qorumaq üçün müəyyən korrektələr etməli olacaq. Əks halda RF bölgə üzrə siyasətində uğursuzluq müşahidə oluna bilər. Ermənistan və Gürcütsanda hərbi mövcudluğunu qoruyan RF Azərbaycanda da SMQ hesabına qalmaq niyyətindədir. Belə olan halda, RF Azərbaycan maraqlarına uyğun olaraq SMQ bölgədə xidmətini daha adekvat etmək məcburiyyətindədir”.
Siyasi şərhçi Ramiyə Məmmədova:
“Bu görüşdə böyük bir irəliləyiş gözləmirəm. Ceyhun Bayramovun Lavrovla görüşündən əvvəl erməni tərəfinin geri addım atması onu göstərir ki, sülh müqaviləsini ləngidir. Yəni, bu görüşdə də nəticə əldə olunmadı. Ermənilər sülhü müxtəlif bəhanələrlə ləngidirlər.
Rusiya sülhməramlı məsələsini həll etməldir. Azərbaycana böyük baş ağrısı verirlər.
Sülh müqaviləsinə gəlincə isə analizlərə, təhlillərə görə uzanacaq”.
Oğuz Ayvaz