– 20 Yanvar ümumxalq hüzn günüdür. Xalqımızın tərcümeyi-halında çox böyük bir faciəli tarixdir. 90-cı illərdə sovetlər dağılan dönəmdə çox böyük acılar yaşadıq.  Bu məkanın tərcümeyi-halı belədir ki, bura 100 il öncə də Çəmbərəkənd qəbiristanlığı olub. Bura Bakı Türk Şəhidliyi kimi də anılıb. O vaxt Azərbaycanın çox böyük ziyalıları burada dəfn olunublar. Əbdürrəhimbəy Haqverdiyev, Cəlil Məmmədquluzadə, komandanlar, cümhuriyyət qurucuları zamanında burada dəfn edilmişdilər. 1939-cu ildə buranı parka çevirdilər və xalqın yaddaşını silməyə çalışdılar. 

1990-cı il yanvarın 19-dan- 20-nə keçən gecə hadisələr gözlərim önündə baş verib. Hadisələrin canlı şahidi olmuşam. Bu məzarların qazılmasının şahidiyəm. Şəhidlərimizin dəfninin iştirakçısı idim. Böyük hüzn yaşadıq. Həmin vaxtlar azərbaycanlıların Ermənistandan çox böyük deportasiyası da olmuşdu. 1980-ci illərin sonunda Ermənistan ərazisində azərbaycanlı qalmamışdı. Azərbaycanlıları didərgin saldıqdan sonra Qarabağa keçdilər. Topxana hadisələri başlamışdı. Burada isə köməksiz, səsi heç yana çatmayan əliyalın xalqımızın meydanlara çıxmaqdan başqa yolu yox idi. Həmin vaxt xalqımızın üz tutduğu məkan Azadlıq meydanı idi. Erməni lobbisi tərəfindən həmin vaxt sovet rəhbərliyinə azərbaycanlıların cəzalandırılması tapşırığı verilmişdi. SSRİ rəhbəri olmuş Mixail Qorbaçov  sovetlər ərazisində bütün münaqişələrin əsasını qoymuşdu. Həmin konfliktlərin ən dəhşətlisi, ən ağırı 20 Yanvar faciəsidir. Bilirsiniz ki, Gürcüstanda aprel hadisələri olmuşdur. Pribaltika ölkələrinə sovetlər birliyinin basqısı olmuşdur, Orta Asiyada digər hadisələr baş vermişdi.

 Ancaq heç biri 20 Yanvar faciəsi ilə müqayisə edilə bilməz.  

Allah şəhidlərimizə rəhmət eləsin!