Rusiyanın birtərəfli atəşkəsi elan etməsinin ardınca Ukrayna cəbhəsinə qarşı həmlələri və aqressiyası daha da artıb. Bu hadisələrdə Belarusun adı da ön cərgələrdə hallandırılmaqdadır. Belə ki, Rusiyanın hərtərəfli hücumlarına əlindən gəldiyi qədər dəstək verən Belarus, həm də Qərbin diqqətini üzərinə çəkib. 

Ötən gün ABŞ Dövlət Departamentinin rəhbəri Entoni Blinkenin verdiyi rəsmi bəyanatda 25 belaruslu parlament (Belarus Respublikası Milli Assambleyası) üzvlərinə viza məhdudiyyətinin qoyulması və ölkədə demokratiyanın pozulması ilə bağlı rəsmi dairələrə edilən xəbərdarlıq bu baxlımdan xeyli diqqət çəkən məqamdır. 

“Hər şey Lukaşenkanın verəcəyi qərardan asılıdır...əgər o manevr etməyə cəhd göstərərsə, Ukrayna ilə Qərb Belarusu yalnız xüsusi “cərrahi” metodlarla hala gətirəcək”. 

Bu sözləri ukraynalı politoloq Vadim Tryuxan Ednews-a açıqlamasında deyib. Onun sözlərinə görə Belarusun Rusiya cəhbəsinə aktiv dəstəyi onun üçün böyük bədəllərin ödənilməsinə səbəb ola bilər: 

“Belarus üçün ən yüngül cəza Rusiyaya tətbiq edilən sanksiyalardır. Əgər rəsmi Minsk bundan nəticə çıxarmasa cəza daha da ağırlaşacaq”. 

Fikirlərinə aydınlıq gətirən politoloq, öz sərhədlərindən Ukraynaya qarşı hücum edəcəyi təqdirdə Belarusu hansı aqibət gözlədiyini belə şərh edib. 

“Birincisi, Belarus ordusu məğlub olacaq və Belarus yarımçıq qalan suverenliyinin tamamını itirəcək. Nəticədə Rusiya dərhal onu özünə  tamamilə ilhaq etməyə çalışacaq.

İkincisi, Belarusa qarşı Rusiyadan daha sərt sanksiyalar tətbiq olunacaq, çünki onun nüvə silahı yoxdur, ona görə də Qərbi təhdid edəcək heç nə yoxdur. Ukrayna bu ölkə ilə diplomatik əlaqələri kəsəcək və istənilən iqtisadi fəaliyyəti dayandıracaq. Əminliklə deyə bilərəm ki, əksər Qərb ölkələri də ona qarşı eyni addımı atacaq.

Üçüncüsü, Rusiya tərəfində Ukraynaya qarşı müharibədə yolunu azmış Belarusiya hökumətinə dəstək olmayan Belarus cəmiyyəti arasında qəzəb partlayışı yaranacaq. Əgər 2020-ci ildə Lukaşenka rejimi etirazların öhdəsindən gələ bilirdisə, bu dəfə nəticə fərqli olacaq. Lukaşenka rejimi yıxılacaq və Belarus yeni demokratik inkişafa qədəm qoyacaq”.

V.Tryuxan Ukraynadakı belarusların bundan sonra vətəndaşlıq statusunun aqibətinə aydınlıq gətirib. Xatırladaq ki, bir müddət əvvəl Ukrayna prezidenti Volodimir Zelenski Ukraynada yaşayan rus millətinin vətəndaşlıqdan məhrum edilməsi ilə bağlı qanun imzalayıb. Ukraynada yaşayan Belarus xalqınını aqibətinə gəlincə:

 “Bu bizim üçün bir qədər fərqli məsələdir. Ukrayna üçün hazırda belaruslardan imtina etmək sərfəli deyil. Həm də Belarus və Ukrayna xalqlarının mövcud olduğu bütün tarixdə bizim aramızda heç vaxt ziddiyyətlər olmayıb. Biz əsrlər boyu dostuq. Xalqlarımızın taleyi çox oxşardır. Hətta İkinci Dünya Müharibəsi zamanı əhalinin ən böyük faizini itirən xalqlarımız olub. Üstəlik, Rusiyaya qarşı müharibədə müstəqillik uğrunda mübarizəmiz zamanı belaruslar Ukraynaya çox kömək ediblər”,- deyə, ekspert əlavə edib. 

Elnur Ənvəroğlu