Xəbər verdiyimiz kimi, 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə terror hücumu olub. Hücum edən şəxs avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar.

Bu dəhşətli hadisə İran və Azərbaycan arasında münasibətlərə necə təsir edəcək? 

Bu barədə siyasi şərhçi Çingiz Göytürk Ednews-a danışıb. O, qeyd edib ki, 44 günlük müharibənin Azərbaycanın zəfəri ilə nəticələnməsindən sonrakı 2 illik müddətdə İranın Azərbaycana qarşı düşmən münasibətləri tamamilə açıq xarakter qazandı. 

“İranın İkinci Qarabağ müharibəsində Ermənistanın yanında durmasına baxmayaraq,  Azərbaycana qarşı təxribat xarakterli fəaliyyətlərini artan bir xəttlə davam etdirdi. Laçın dəhlizi məsələsində düşmənə dəstək vermək, erməniləri silahlandırmaq, sərhədlərdə hərbi təlimlər keçirmək, terroçularını qanunsuz şəkildə bölgəyə göndərmək, mətbuatda misli görülməmiş formada Azərbaycana qarşı ideoloji təbliğat savaşı aparmaq kimi bir çox fakt İranın son 2 ildə Azərbaycana qarşı apardığı fəaliyyətlərin görünən qismidir”. 

Politoloqun sözlərinə görə, İranın səfirlikdə törətdiyi terror hadisəsi bir daha sübut etdi ki, biz onlarla normal qonşuluq münasibətləri yaşaya bilməyəcəyik. 

“Hadisədən sonra Azərbaycanın İranla münasibətlərini minumum səviyyəyə endirəcəyi ən güclü ehtimaldır. Zənn etmirəm ki, İran Azərbaycana qarşı hər hansı bir ciddi addım atsın. Ancaq söhbət İrandan gedirsə hər cür hüquqa, beynəlxalq norma və etik dəyərlərə zidd addımlar atması da heç də istisna oluna bilməz”.

Güneyli yazıçı Məsud Haray açıqlamasında bildirdib ki, fars rejiminin son nəfəsləridir və çabalayırlar. Onlar güney Azərbaycan azadlıq hərəkatının önünü kəsməyə çalışırlar. Amma unutmasınlar ki, biz daha da güclənirik.

“Sözügedən terror hadisəsinə səssiz qalmamalıyıq. Etiraz aksiyaları hazırlamaq lazımdır. İstər güney azərbaycanlıları, istərsə də quzey azərbaycanlıları və dünyanın hər yerində yaşayan azərbaycanlılar birliyimizi nümayiş etdirməyin, Azərbaycanın bütov olduğunu bir daha İran rejiminə elan etməyimizin zamanı artıq gəlib çatıb. Əminəm ki, bu etirazlar gerçəkləşəcək.

M.Haray əlavə edib ki, güney azərbaycanlılar Azərbaycanın yanında deyil, onlar elə məhz Azərbaycanın özüdür.

"Fars molla rejimi unutmasın ki, hər nə etsələr də, bizi bir-birimizdən ayıra, qopara bilməyəcəklər. Onlar da görəcəklər ki, biz yorulmadan bütöv Azərbaycanı quracayıq. Hazırda İrandakı məlum hadisələr səbəbindən güney azərbaycanlıların küçələrə çıxıb etiraz aksiyaları keçirməkləri olduqca çətindir”.

Oğuz Ayvaz