NATO-nun keçmiş Baş Katibi Anders Foq Rasmussen Azərbaycanın Rusiyanın taleyindən nəticə çıxartmalı olduğunu bildirib.
Bu barədə “The Economist” nəşri məlumat yayıb. Keçmiş baş katib uzun illər ermənilərin Azərbaycan ərazisinin 20%-ni işğal etməsinə baxmayaraq, belə bir açıqlaması ilə Azərbaycanı təcavüzkar olmasında ittiham edib.
Məsələ ilə bağlı Ednews-a açıqlamasında politoloq Tural Əliyev bildirib ki, Rasmussenin açıqlamalarına baxdıqda, onun sırf lobbiçilik fəaliyyətini öz üzərinə götürmüş, pulla xidmət göstərən bir şəxs kimi görmək olar. Onun sözlərinə görə, belə açıqlamalar dövlət səviyyəsində yaxud da hansısa proseslərə təsir edə biləcək qüvvəyə malik deyil.
“Əvvəla onu qeyd etmək lazımdır ki, Anders Foq hazırda Qlobal Rasmussen Konsaltinq şirkətinin rəhbəridir. Heç kimə sirr deyil ki, bu konsaltinq şirkətlər pullu məsləhətlər həyata keçirir. Pulunu ödə, məsləhəti qazan. Anders Foqun sözlərinə əslində əhəmiyyət vermək lazım deyil. Adətən Qərb idarəetmə sistemində və ya menecmetində vəzifədən azad olunduqdan sonra özlərinin yüksək səviyyədə təmin etmək üçün belə bir konsaltinq şirkətlər qurulur. Bu bütün dünyada qəbul olunan bir qaydadaır. Sonra da ayrı-ayrı dövlətlərə pullu fəaliyyət xidməti göstərilir. Belə şirkətlər hətta lobbiçilik üçün də dəstəklərini əsirgəmirlər. Bu baxımdan Rasmussenin İrəvanda bir sıra görüşlər keçirməsi əbəs yerə deyil”.
Politoloqun sözlərinə görə hazırda Azərbaycan-Ermənistan arasında sülh danışıqlarının dalana dirənməsi, Qarabağ daxilində gərginliyin qalması və sərhəddə hər an eskolasiya ola bilmə ehtimalı da var.
“Görünür, onu da gətiriblər ki, belə açıqlama versin və beynəlxalq ictimayyəti çaşdırsın. Erməni lobbisi həm də bu hərəkətlə Rasmusseni müəyyən dərəcədə əlaqəli olduğu Avropa siyasilərinə bir təsir kimi də istifadə edirlər. Onlar bu yolla dünyaya guya Azərbaycan təcavüzkar siyasət apardığını, Ermənistanın suverən ərazilərinə daxil olduğunu sübut etmək istəyirlər. Onlar bir şeyi unudurlar ki, hazırda Ermənistan və Azərbaycan arasında sülh müqaviləsi imzalanmayıb. Qarabağ daxilində qondarma, qanunsuz hərbi birləşmələri çıxarılmayıb. Biz onu şərti sərhəd adlandırırıq. Çünki delimitasiya və demarkasiya prosesi olmadığından heç bir suverən ərazilərin işğalından söhbət belə gedə bilməz”.
Oğuz