Ermənilərin Rusiya sülhməramlı kontingentinin müvəqqəti yerləşdiyi Azərbaycan ərazisində, Xankəndi-Xəlfəli-Turşsu və bu marşrutdan şimalda keçən Xankəndi-Kosalar-Mirzələr-Turşsu yollarında bərpa işləri etməyə cəhd göstərib. Nəticədə Azərbaycan Ordusunun hərbçiləri adı çəkilən torpaq yollarda post quraraq separatçıların bu niyyətinin qarşısını alıblar.

Teleqram kanallarında Erməni texnikasının Xankəndi-Turşsu yolundan geri qayıtması haqqında görüntülər yayılıb. Rusiya sülhməramlıları öz missiyasının öhdəsindən gələ bilmədiyi üçün Azərbaycan yenə də öz gücü ilə məsələyə müdaxilə edib. Bu da Rusiya sülhməramlılarının o ərazilərdə hansı səbəblə qalması barədə şübhələri yenidən gündəmə gətirib. 

Məsələ ilə bağlı Ednews-a danışan hərbi ekspert Ramil Məmmədli bildirib ki, artıq vəziyyət bəllidir. Azərbaycanın Qarabağda nəzarət etmək istədiyi istiqamətlər də tam müəyyənləşib. Bir neçə ay bundan əvvələ qədər mövcud problemin həlli ilə bağlı Ermənistandan Xankəndi istiqamətinə silah və hərbi təyinatlı vasitələrin daşınması məsələsinin qarşısını almaqla bağlı müəyyən fikir mübadiləsi aparılırdı. 

“Azərbaycan ordusu Laçın rayonu ərazisində deyil, yolun nəzarətə götürülməsi prosesini Şuşada həyata keçirtdib. Hesab edirəm ki, mövcud vəziyyətdə Azərbaycan ordusunun həyata keçirdiyi bu tədbir əslində Rusiya sülhməramlılarına qarşı deyil. Çox təəssüf edirəm ki, son vaxtlar Qarabağda baş verən hadisələrlə bağlı birmənalı olaraq Rusiya sülhməramlıları ittiham obyekti olur. Unutmayaq ki, hərbi yüklər, hərbi təyinatlı nəqliyyat vasitələri, silah və sursatlar Ermənistan ərazisindən gəlir. Ermənistan ərazisindən Qarabağa göndərilir. Burda təbii ki, rus  sülhməramlılarının kontingetinin məsələ ilə bağlı missiyasına uyğun olmayan, hətta deyərdim ki, bölgədə sülh və əmin-amanlığa qarşı addımlar atırlar. Erməni hərbi karvanının müşahidə edilməsi və həmçinin onların keçidinin təmin olunması qəbul edilməzdir. Amma əsas ittiham obyekti Ermənistan olmalıdır. Rusiya ilə bağlı bu cür sərt, ictimai fikrin formalaşması Azərbaycan-Rusiya münasibətlərinə heç də müsbət təsir etməyəcək”. 

Oğuz

• Tag:
• Hərbi eskpert
• Azərbaycan-Rusiya
• siyasət