Aprelin 23-də İranın paytaxtı Tehranda qondarma “erməni soyqırımı”nın 105-ci “ildönümü” qeyd edilib.
Anti-Azərbaycan və anti-türk siyasəti yürüdən İranda hər il qondarma “erməni soyqırımı” ilə bağlı tədbir və yürüş keçirilir.
Maraqlıdır, İran molla rejimi özünü islam dininin təşəbbüskarı sayaraq 30 il işğal zamanı Azərbaycan ərazilərində yandırılan, donuz damına çevrilən məscidlər üçün özünün “qırmızı xətti” adlandırdığı Ermənistanı niyə qınamırdı?
“Özünü İslam dövləti adlandıran İranın Ermənistanın Azərbaycana qarşı 30 ilə yaxın bir müddətdə davam edən işğalçılıq siyasətinin ən önəmli himayəçilərindən biri kimi çıxış etməsi, torpaqlarımız işğalçılardan təmizləndikdən sonra isə erməni separatçılarına və separatizmə açıq və gizli şəkildə verdiyi dəstək bu siyasətin açıq təzahürüdür”.
İranın erməniləri dəstəkləyən və islama zidd siyasəti ilə bağlı Ednews-a açıqlamasında bu fikirləri səsləndirən güneyli siyasi şərhçi Çingiz Göytürk bildirib ki, İran öz sərhədləri daxilində yaşayan ermənilərdən də bu siyasətdə effektiv şəkildə istifadə etməyi bacarır:
“Xüsusilə, son bir əsrdə ermənilərin Güney azərbaycanlılara qarşı törətdikləri bütün cinayət və vəhşiliklərdə İran dövləti və fars şovinizminin izlərinə rastlamaq heç də çətin deyil”.
Çingiz Göytürk qeyd edib ki, bu gün sayları 70 mini aşmayan ermənilərə İranda heç bir milli və dini azlığa, hətta ən böyük etnik qrup olan Güney Azərbaycan türklərinə verilməyən haqlar verilib:
“Üstəlik, həmin müstəsna hüquq və azadlıqların həyata keçirilməsi üçün açıq və ya gizli, dövlətin bütün imkanları səfərbər edilməkdədir. Bu siyasət sadəcə İslam Cümhuriyyəti dönəmində deyil, həm də onun sələfi olan Pəhləvi rejimində də eyni formada aparılıb. Qondarma soyqırım abidələrinin tikilməsi, anti-türk və anti-azərbaycan təbliğatının aparılması, Güney Azərbaycan türklərinə qarşı fiziki və mənəvi təzyiqlər və s. bunu sübut edir. 24 aprel qondarma soyqırım günü də İranın erməni faktorunu qabardaraq özünün çirkin siyasətini gerçəkləşdirməkdə hər il istifadə etdiyi bir vasitədir. Xatırlayıram ki, hələ 1991-ci il 24 aprel günündə ermənilər Təbrizdə İran ərazilərini öz tərkibinə alan “Böyük Ermənistan” xəritəsini sərbəstcə yaymışdılar. İran dövlətinin buna reaksiya verməməsi, tam əksinə, bunun yayılmasına şərait yaratması, əslində, həqiqəti bütün çılpaqlığı ilə göz önünə sərir”.
Törə Zeynal