Brüsseldə Azərbaycan Prezidenti İlham Əliyev, Avropa İttifaqı Şurasının prezidenti Şarl Mişel və Ermənistanın baş naziri Nikol Paşinyan arasında üçtərəfli görüş keçirilib. Üçtərəfli görüşdə sərhədlərin delimitasiyası, nəqliyyat xətlərinin açılması, humanitar məsələlər və Qarabağda yaşayan erməni əhalinin haqları və təhlükəsizliyi məsələsi müzakirə edilib.

Görüşdən sonra mətbuata açıqlama verən Şarl Mişel liderlərin Brüsseldə beşinci görüşünə ev sahibliyi etməkdən məmnunluğunu ifadə edib və müzakirələrin səmimi, açıq və nəticəyönümlü olduğunu, Azərbaycan-Ermənistan münasibətlərinin normallaşması yolunda irəliləyişə diqqət yetirildiyini bildirib.

Görüşü Azərbyacan üçün uğurlu hesab etmək olarmı? Şarl Mişelin ölkəmizlə, Qarabağla bağlı müsbət açıqlamaları hansı dəyişikliklərə gətirib çıxaracaq?

Görüşlə bağlı Ednews-a şərh verən Prezident yanında Dövlət İdarəçilik Akademiyasının müşaviri, Bakı Politoloqlar Klubunun sədri Zaur Məmmədov bildirdi ki, son iki görüşdə, həm Blinken, həm də Mişel Azərbaycanın tələblərini məqbul hesab edib və barışmalı olublar.

“Ermənistanın danışıqlarda Qarabağla bağlı əsas istəyi - beynəlxalq təşkilat və ya aktorların Bakı-Xankəndi arasında danışıqlarda iştirakını leqallaşdırmaq (hüquqi sənədlə təsdiqləməkdir). Lakin, bugünkü danışıqlarda bir daha Azərbaycan prinsipiallıq nümayiş etdirərək bu tələbi rədd edib. Rəsmi Bakı öz ərazisindəki ermənilərlə dialoqda üçüncü tərəfə tribuna təqdim edilməsinə etiraz etmir. Lakin, Bakı ATƏT-in Minsk qrupu təcrübəsini nəzərə alaraq kiminsə danışıqlarda iştirakını kağızda həkk etməyəcək”. 

Politoloqun sözlərinə görə, Azərbaycan və Ermənistan bir-birinin ərazi bütövlüyünü tanıyır. 

“Bu dəfə məhz rəqəmlərdən istifadə edilməsi Ermənistanın ərazi bütövlüyü ilə bağlı bugünə qədər apardığı manipulyasiyaya son qoyur. Beləcə, bizim üçün ən əsas iki məsələ ilə bağlı Paşinyan razılaşıb. Paşinyan Qarabağ ermənilərinin Azərbaycanın tərkibində hüquq və təhlükəsizliklərinə təminatı istəyir.

Beləliklə, Brüsseldə bağlı qapılar arxasında Paşinyan Azərbaycanın şərtləri ilə razılaşıb, bu dəfə daha konkret nəticələr əldə edilib. Lakin, gözlənilən odur ki, Paşinyan daha bir müddət vaxtın uzadılması ilə məşğul olacaq”.

Xatırladaq ki, Azərbaycan və Ermənistan liderləri arasında Brüsseldə Şarl Mişelin vasitəçiliyi ilə dörd görüş baş tutub. İlk görüş 14 dekabr 2021-ci ildə, ikinci görüş 6 aprel 2022-ci ildə, üçüncü görüş isə 23 may 2022-ci ildə, son görüş isə 31 avqust 2022-ci ildə keçirilib.

Həmçinin ötən il oktyabrın 6-da Praqada baş tutan Avropa Siyasi Birliyinin Sammitində Azərbaycan prezidenti İlham Əliyev, Fransa prezidenti Emmanuel Makron, Avropa İttifaqı Şurasının prezidenti Şarl Mişel və Ermənistan baş naziri Nikol Paşinyanın dördtərəfli formatda görüşü keçirilib.

Oğuz