Keçən ilin sentyabrında iki ölkə arasında əldə olunan razılaşmaya əsasən Fransa artıq Ermənistana silah tədarük etməyə başlayıb. 50 zirehli texnika və hava hücumundan müdafiə raketləri Ermənistana göndəriləcək.
Bu barədə məlumat verən İsrail nəşri bunu Fransanın Qafqazdakı mübarizəyə daxil olması və İsrailin müttəfiqi Azərbaycan üçün təhlükə kimi şərh edib.
Fransanın Ermənistana silah göndərməsi Qarabağdakı vəziyyətə necə təsir edəcək? Azərbaycanı həqiqətən də təhlükə gözləyirmi?
“2022-ci ildə Ermənistan və Fransa arasında aparılan aktiv danışıqlar nəticəsində Ermənistana müvafiq hərbi yardımın göstərilməsi nəzərə alınıb. Eyni zamanda Azərbaycana qarşı qəbul edilmiş Qətnamədə də Ermənistanın silahlandırılması faktı öz əksini tapıb”.
Fransa ilə Ermənistan arasındakı hərbi sahədə imzalanan anlaşmanı və bunun region üçün ehtimal edilə biləcək nəticələrini Ednews-a şərh edən politoloq Amid Əliyev bildirib ki, bu ilin aprel ayında bölgəyə səfər edən Fransa XİN rəhbəri Ketrin Kolonna Ermənistanda olarkən, Fransanın İrəvandakı səfirliyində xidmət edən hərbi əməkdaşların sayının artırılacağını bəyan edib.
“Bir neçə gün öncə isə Fransa İrəvana yeni hərbi attaşe təyin etdi. Daha sonra isə Fransa siyasi hakimiyyəti isə Ermənistana öldürücü silahların, ardıyca isə artıq 60-a yaxın döyüş texnikasının verilmə ehtimalının olduğunu bildirdi”.
A.Əliyev burada ortaya çıxan iki əsas məqamdan da danışıb:
“Birincisi, Fransa Ermənistana yardım etməklə qüvvələr nisbətində fərq yaratmaq istəyir ki, burada da əsas məqsəd Azərbaycana təzyiqin artırılmasıdır. Bu variant öz təsdiqini tapacağı halda, Kişinyov və növbəti Brüssel görüşlərinin əhəmiyyəti ciddi şəkildə zədələnmiş olur. Nəzərə almaq almaq lazımdır ki, artıq bir dəfə Praqa görüşündən dərhal sonra Fransa belə provokasiyaya əl atıb.
İkincisi isə, Fransadan alınan silahların Ermənistan üzərindən Rusiyaya çatdırılması faktıdır. Bu gün Ukrayna təhlükəsizlik xidməti məhz bu faktla bağlı öz narahatlığını bəyan edib. Buna əsas verən amil kimi Rusiyanın bu məsələyə hələ ki, səssiz qalmasını göstərmək olar. Hətta, Fransa KTMT-dən çıxma məsələsini də gündəliyə gətirir ki, bu da özlüyündə Rusiyanın siyasi-hərbi maraqlarına dabandabana ziddir”.
Siyasi şərhçi qeyd edib ki, hər iki halda Fransanın bu addımı onun siyasi hakimiyyəti üçün ağır nəticələrə səbəb olacaq. Çünki Fransa bölgədə əsas söz sahiblərindən birinin Rusiya olduğunu çox gözəl bilir və onun xeyir-duası olmadan belə bir addım atıla bilməz.
“Ehtimal etmək olar ki, Fransa ilə Rusiya bu xüsusda gizli razılığa gəliblər. Bu öz təsdiqini tapsa, Fransa Qərbin, əsasən də ABŞ-ın qəzəbinə tuş gələcək.
Beləliklə, özü qurban olan Ermənistandan sonra növbəti qurbanın kim olacağı yaxın zamanda bilinəcək”.
Son olaraq, A.Əliyev əlavə edib ki, bütün bunlar Azərbaycana ciddi şəkildə təhlükə yarada bilməz:
“Belə ki, Azərbaycan ordusunun hazırki vəziyyəti və tutduğu mövqelər yarana biləcək təhlükələrin vaxtından əvvəl qarşısını almaq imkanı verir. Sadəcə bu cür addımlar sülh gündəliyinin icrasını bir qədər gecikdirə bilər”.
Törə Zeynal