6 fəsil və 30 maddədən ibarət "Siyasi partiyalar haqqında" yeni qanunda siyasi partiyaların yaradılması və fəaliyyəti üçün əvvəlki qanunla müqayisədə daha sərt tələblər müəyyən edilib. Əvvəlki qanunla siyasi partiyanın qeydiyyatı üçün 1000 üzv kifayət idisə, yeni qanunla bu tələb 5 dəfə artırılıb.
Qanunun keçid müddəalarında qeydiyyatda olan partiyalardan üzvlərinin sayını 5 min nəfərə çatdırmaq tələb olunur və bunun üçün onlara 6 ay vaxt verilir. Partiyaların üzv sayı 4500-dən aşağı olacağı təqdirdə Ədliyyə Nazirliyi partiyaların ləğvi üçün məhkəməyə müraciət edə bilər.
Bəs digər partiyalar fəaliyyətinə davam etmək üçün 5000 üzv toplayıbmı?
Müasir Müsavat Partiyasının (MMP) sədri Hafiz Hacıyev bildirdi ki, təxminən 70-80 min partiya bileti paylanan üzvlərimiz var.
“Hələ təəssübkeşlərimizi demirəm. Belə olanda 100-110 min edir. Artıq imzalarımız da var. Biz 10 min də, 20 min də imza verə bilərik. Bu sarıdan heç bir problemimiz yoxdur, çünki oturuşmuş rayon təşkilatlarımız mövcuddur. Düşünürəm ki, “Siyasi partiyalar haqqında” Qanun çox normaldır, Prezidentin fərmanı da çox təqdirəlayiqdir. Bu qanun da partiyaların gələcəyinə inkişaf verən bir qanundur. Belə olduğu halda imkanı olmayan, bir “papka”sı, bir özü olan partiyalar özünü buraxmalıdır. Burada bir qəbahət yoxdur. Onlar müəyyən partiyalarla birləşib yollarına davam etsinlər”.
Real partiyasının Siyasi Komitəsinin üzvü Natiq Cəfərli yeni qanunda nəzərdə tutulan üzv sayının artıq tamamlanmaq üzrə olduğunu deyib.
"Üzv sayı ilə bağlı proses yekunlaşmaq üzrədir. Böyük ölçüdə tamamlamışıq, çox az bir miqdar qalıb, onu da bu ay ərzində tamamlamaq fikrimiz var".
Ağ Partiyanın sədri Tural Abbaslı üzvlük məsələsində yəşkilatımızın qanun qəbul edilməmişdən 10 minə yaxın üzvü olub. Hazırda isə üzvlərimizin sayı 11 min civarındadır. Ona görə də yeni üzvlərin qəbulu istiqamətində xüsusi işləmək, rayonlara gedib üzv toplamaq problemimiz yoxdur.
“Adi qaydada təbliğat apararaq, partiyaya üzv qəbul edirik. Hər həftə 30-40 nəfərə qədər insan partiyamıza üzv qəbul olunur. Qeydiyyatla bağlı bu istiqamətdə heç bir problemimiz yoxdur ki, üzv qəbulu ilə bağlı xüsusi iş qrafiki hazırlayaq”.
Vətəndaş Həmrəyliyi Partiyasına (VHP) gəlincə, 20 minə yaxın üzvünün olduğu söylənilir. Deputat Fəzail Ağamalının rəhbəri olduğu Ana Vətən Partiyasının da 5 minlik limiti keçdiyi açıqlanıb.
Azərbaycan Milli İstiqlal Partiyasının (AMİP) sədri Arzuxan Əlizadə mətbuata müsahibəsində partiyanın 30 mindən çox üzvü olduğunu qeyd edib.
Oğuz
